Масъулини Вазорати нақлиёти Ҷумҳурии Тоҷикистон аз вазъи садамаҳои нақлиётӣ дар кишвар изҳори нигаронӣ карданд, ки нисбати соли гузашта чунин ҳолатҳо афзудааст.

Азим Иброҳим вазири нақлиёти кишвар зимни нишасти хабариаш гуфт, ки дар соли 2024 зиёда аз 477 садамаҳои нақлиётӣ рух додааст, ки он нисбати соли 2023 183 адад зиёд аст. Ин шумора дар соли 2023 294 ҳолатро ташкил медод.

Ҳамзамон, ӯ қайд намуд, ки шумораи фавтидагон низ мутаносибан нисбати соли 2023 зиёд ба қайд гирифта шудааст.

Зикр гардид, ки 541 нафар дар садамаҳои нақлиётии кишвар ҷароҳатҳои гуногуни ҷисмонӣ бардоштаанд.

Ӯ аз ин вазъ изҳори нигаронӣ намуда, зикр кард, ки дар ин самт мушкилоти ҷиддӣ вуҷуд дорад. Ӯ яке аз омилҳоро ба суръати баланди ҳаракати ронандагон рабт дод.

- Рақамҳо нишондиҳандаи онанд, ки мо дар ин самт мушкилот дорем, вале ман намехоҳам ҳамаи ин мушкилотро айби ронандагон кунам. Аммо ронандагон бениҳоят бо суръати баланд ҳаракат мекунанд. Онҳо дидаву дониста дар роҳҳои ноҳамвор суръаташонро баланд мекунанд, - гуфт вазир.

Чунин садамаҳо бештар дар роҳҳое, ки хатарноканд, рух медиҳанд.

Фарзонаи УМАРАЛӢ, "ҶТ"