Варзиш ҳамеша яке аз нишондиҳандаҳои муҳими рушду нумӯъ ва нуфузи ҳар як давлату миллат ба ҳисоб меравад. Миллате, ки варзишгарони муваффақ дорад, худро дар арсаи байналмилалӣ бо ифтихор муаррифӣ мекунад. Имрӯз Тоҷикистон низ дар қатори кишварҳое қарор дорад, ки фарзандони болаёқаташ дар риштаҳои гуногуни варзиш парчами давлатиро боло мебардоранд. Яке аз чунин симоҳои умедбахш дар варзиши муосир Бежан Абдуллоев аст, ҷавоне, ки бо иродаи қавӣ ва меҳнати пайваста роҳи худро дар пойгаи мошинронӣ, бахусус картинг ҳамвор намудааст.

Картинг, ки имрӯз ҳамчун пояи асосии мотоспорти касбӣ шинохта мешавад, таърихи ҷолиб дорад. Аввалин мошинҳои одии пойга бо чархҳои кушода ҳанӯз дар замони Ҷанги Бузурги Ватанӣ аз ҷониби халабонҳои низомии амрикоӣ ҳамчун воситаи вақтхушӣ сохта шуда буданд. Он замон касе гумон ҳам намекард, ки ин шавқи сода рӯзе ба як варзиши маъруфи ҷаҳонӣ табдил меёбад. Бо гузашти солҳо картинг рушд кард, суръати мошинҳо то ба 260 километр дар як соат расид ва ин навъи пойга ба мактаби воқеии тарбияи қаҳрамонҳои ояндаи Формула табдил ёфт. Ташкили ширкати Go-Kart дар соли 1957 ва таъсиси Комиссияи байналмилалии картинг дар назди FIA дар соли 1962 ин равандро боз ҳам тақвият бахшид. Соли 1964 аввалин чемпионати ҷаҳон оид ба картинг дар шаҳри Рим баргузор гардид ва картинг расман ба саҳнаи варзиши ҷаҳонӣ ворид шуд.

Дар чунин варзиши пуртазод ва рақобатпазир имрӯз номи як ҷавони тоҷик Бежан Абдуллоев садо медиҳад. Ӯ соли 2006 дар шаҳри Душанбе ба дунё омада, нахустин орзуҳои худро парвариш кардааст. Аз овони наврасӣ муҳаббат ба суръат, техника ва рақобат дар дили ӯ реша давонд. Картинг барои Бежан танҳо як шавқ набуд, балки роҳи зиндагӣ, мактаби сабр, устуворӣ ва худшиносӣ гардид.

Бо вуҷуди хеле ҷавон будан, Бежан имрӯз варзишгарест, ки таҷрибаи бойи байналмилалӣ дорад. Ӯ таҳсили худро дар Донишгоҳи Шанхай идома дода, донишҳои назариявиро бо тамрини амалӣ дар мотоспорт ба ҳам пайвастааст. Ин ҳамгироии илм ва таҷриба ба ӯ имкон додааст, ки ҳар мусобиқаро бо таҳлили дақиқ, стратегия ва ҳисобу китоб анҷом диҳад. Ҳадафи асосии Бежан роҳ ёфтан ба Формула 4-и Амороти Муттаҳидаи Араб ва дар оянда қадам гузоштан ба Формула 1 мебошад, орзуе, ки танҳо бо истеъдод не, балки бо меҳнати шабонарӯзӣ амалӣ мешавад. Натиҷаҳои бадастовардаи ӯ гувоҳи равшани ин заҳматанд.

Бежан ғолиби чандин марҳилаҳои байналмилалӣ, сабткунандаи рекордҳо ва соҳиби пирӯзиҳо дар мусобиқаҳои сатҳи баланд аст. Қаҳрамонӣ дар “Grand Slam” ва унвони қаҳрамони Чин дар чемпионати картинги CRKC ӯро ба яке аз пурқувваттарин ронандагони мавсим табдил дод. Агар соли гузашта ӯ ба ҷойи дуюм қаноат карда бошад ҳам, бо ваъдае, ки ба мардуми тоҷик дод, имсол бо руҳияи қавӣ ба майдон баромад.

7 декабри соли 2025 дар шаҳри Ханчжоу, дар финали Чемпионати раллии Чин, Бежан Абдуллоев бо маҳорати баланд ва боварии комил баромад кард. Ӯ пойгаро бенуқсон анҷом дода, 12 даврро дар муддати 11:33.349 тай намуд ва рақибони худро қафо гузошт. Пирӯзӣ бар ронандаи чинӣ Чжоу Гуаню бо фарқи 2,753 сония нишон дод, ки ин ҷавони тоҷик дар мавсими имсола воқеан қавитар буд. Рӯзи дигар низ ӯ рекорди мутлақ гузошт: аз 7 пойга 6 пирӯзӣ ва 5 ғалабаи пайиҳам. Натиҷае, ки на ҳар варзишгар ба он мерасад.

Имрӯз Бежан Абдуллоев танҳо як қаҳрамон нест, балки намунаи ҷавоне мебошад, ки бо меҳнат, ирода ва орзуи бузург метавонад Тоҷикистонро дар баландтарин минбарҳои варзиши ҷаҳон муаррифӣ кунад. Роҳи пешорӯи ӯ ҳанӯз тулонӣ аст, аммо дастовардҳои имрӯзааш шаҳодат медиҳанд, ки ин роҳ бо эътимод, сабр ва пирӯзиҳои нав идома хоҳад ёфт.
Мо низ ба ин варзишгари кишвар дар роҳи интихобнамудааш комёбиҳои бештар ва фатҳи қуллаҳои баландтари мотоспорт-ро орзу менамоем.

Рустам САМИЕВ,“ҶТ”