Дар шашмоҳаи аввали соли равон ҳангоми оббозӣ дар дарё ва кӯлҳои кишвар 91 нафар ҷони худро аз даст додаанд. Ин шумора нисбати соли гузашта 5 адад зиёд мебошад.

Дар ин бора Раҷабалӣ Раҳмоналӣ, раиси Кумитаи ҳолатҳои фавқулода ва мудофиаи граждании назди Ҳукумати кишвар зимни нишасти хабарӣ иттилоъ дод.

Аз ҷумла, зикр гардид, ки сабаби ғарқшавӣ бештар риоя накардани техникаи бехатарӣ ҳангоми оббозӣ ва беназоратии волидон мебошад.

Аз ҳама бештар ҳолати ғарқшавӣ дар вилояти Хатлон ба амал омадааст ва шумораи ҳалокшудагон 41 нафарро ташкил медиҳад.

Боқимонда дар вилояти Суғд 17, ВМКБ 14, шаҳри Душанбе 7 ва дар ноҳияҳои тобеи ҷумҳурӣ 12 нафар ҳангоми оббозӣ ғарқ гардидаанд.

Раҷабалӣ Раҳмоналӣ гуфт бо вуҷуди анҷоми корҳои фаҳмондадиҳӣ ва насби навиштаҷотҳо, ҳодисаҳои ғарқшавӣ дар дарё ва кӯлҳои Тоҷикистон ҳамоно ташвишовар боқӣ мондааст.

С. ҚИЁМИДДИН, “ҶТ”