Дар шаҳри Абу-Дабии Амороти Муттаҳидаи Араб мусобиқаи бонуфӯзи “Abu Dhabi Grand Slam – 2025” баргузор гардид, ки дар он беҳтарин ҷудокорони ҷаҳон барои медалҳо ва имтиёзҳои феҳристи ҷаҳонӣ мубориза бурданд. Рӯзи дуюми мусобиқа барои ҷудои тоҷик бо дастовардҳои назаррас анҷом ёфт. Намояндагони кишвар — Абубакр Шеров ва Муҳиддин Асадуллоев дар вазни то 73 кг, Сунатулло Мӯсоев ва Беҳрӯз Хоҷазода дар вазни то 81 кг ба татамӣ баромаданд ва бо рақобатҳои зебову дидани Тоҷикистонро муаррифӣ намуданд. Аз миёни онҳо Муҳиддин Асадуллоев медали нуқра, Сунатулло Мӯсоев медали биринҷӣ ба даст оварданд, Абубакр Шеров мақоми панҷумро касб кард ва Беҳрӯз Хоҷазода мусобиқаҳоро бе медал ҷамъбаст намуд.

Пирӯзии Муҳиддин Асадуллоев дар ин мусобиқа ҳамчун як дастоварди муҳим ва хотирмон дар таърихи ҷудои тоҷик сабт гардид. Ҷудокори 19-сола, ки қаҳрамони ҷаҳон миёни ҷавонон низ мебошад, аз даври аввал то ба финал бо баромадҳои боварибахш ҳунарнамоӣ кард. Муҳиддин дар даври аввал озод буд ва дар даври дуюм бо варзишгари чинӣ Лин Гаоҳуй рақобат намуда, ба даври баъдӣ роҳ ёфт. Ҳангомаи асосӣ дар даври сеюм ба амал омад: Асадуллоев бо қаҳрамони Бозиҳои Олимпӣ ва дукарата қаҳрамони ҷаҳон Ҳидоят Ҳайдаров аз Озарбойҷон рӯ ба рӯ шуд. Ин рақобат, ки бисёриҳо онро яке аз сабқатҳои вазнини рӯзи мусобиқа медонистанд, бо ғалабаи Муҳиддин ба анҷом расид. Ин натиҷа на танҳо ҷасорати варзишгари ҷавон, балки рушди босуръати ҷудои тоҷикро низ собит намуд ва нишон дод, ки паҳлавонони кишвар имрӯз тавони рақобат бо ситораҳои бузурги ҷаҳониро доранд.

Дар чорякниҳоӣ Муҳиддин бар ҷудокори Руминия Дзитак Иоан пирӯз шуд ва ба нимниҳоӣ роҳ ёфт. Сипас, дар даври нимниҳоӣ бо иҷрои тактикаи муассир бар ҷудокори Бразилия Даниел Гаргнин бо имтиёзи вазарӣ ғалаба карда, мақоми худро дар финал таъмин намуд. Дар даври ниҳоӣ Асадуллоев бо варзишгари пуртаҷриба Нилс Стамп аз Швейтсария рӯ ба рӯ шуд. Гарчанде варзишгари тоҷик муборизаи хеле шоиста нишон дод, таҷрибаи рақиб бартарӣ пайдо кард ва Муҳиддин ба гирифтани медали нуқра қаноат кард. Ин дуюмин медали Муҳиддин аз мусобиқаҳои сатҳи “Тоскулоҳи бузург” дар соли 2025 мебошад, зеро қаблан дар “Dushanbe Grand Slam – 2025” медали тиллоро ба даст оварда буд.

Дар баробари ин, Сунатулло Мӯсоев дар вазни то 81 килограмм бо иҷрои баромадҳои устувор ба гирифтани медали биринҷӣ муяссар гардид ва ҷойгоҳи Тоҷикистонро дар рӯйхати ғолибони рӯзи мусобиқа боз ҳам баландтар бардошт.

Қайд кардан зарур аст, ки мусобиқаи “Abu Dhabi Grand Slam – 2025”, ки аз 28 то 30 ноябр доир гардид, яке аз чорабиниҳои асосии тақвимии Федератсияи байналмилалии ҷудо ба ҳисоб меравад. Дар он 373 варзишгар аз 52 кишвар иштирок дошт. Маблағи умумии ҷоизаҳо бошад 154 ҳазор евроро ташкил медод, ки барои медали тилло 5000 евро, медали нуқра 3000 евро ва медали биринҷӣ 1500 евро тақдим гардид. Ҳамзамон, натиҷаҳои мусобиқа ба феҳристи ҷаҳонӣ таъсири мустақим доранд. Ғолибон 1000 имтиёз, ҷойҳои дуюм 700 имтиёз ва барандагони ҷойҳои сеюм 500 имтиёз ба даст меоранд.

Баромадҳои Муҳиддин Асадуллоев ва Сунатулло Мӯсоев дар рӯзи дуюми мусобиқа нишон дод, ки ҷудои тоҷик имрӯз яке аз риштаҳои пешбари варзишӣ дар кишвар гардида, паҳлавонони мо дар сатҳи ҷаҳонӣ қадамҳои устувор мегузоранд. Ин муваффақиятҳо ба руҳияи ҳаводорони варзиш, ба феҳристи ҷаҳонии ҷудо ва ба нуфузи варзиши тоҷик таъсири мусбат гузошта, барои ҷавонони зиёди кишвар илҳоми нав мебахшанд.

Яҳё МАҲМАДНАБИЕВ, “ҶТ”