Дар доираи омодагӣ ба қисми ниҳоии Ҷоми Осиё-2025 мунтахаби наврасони Тоҷикистон (U-17) таҳти роҳбарии Марко Раҷини дар Анталияи Туркия ҷамъомади омӯзишии дуҳафтаина доир мекунад.

Дар ин бора аз Федератсияи футболи Тоҷикистон хабар доданд.

Ба иттилои манбаъ дар доираи ҷамъомади таълимиву тамринӣ дар Туркия, ки аз 8 то 24 январ баргузор мешавад, мунтахаби наврасони мо панҷ бозии санҷишӣ анҷом медиҳад. Аммо то кунун ҳарифони наврасони тоҷик эълон нашудааст.

Лозим ба ёдоварист, ки мунтахаби наврасони Тоҷикистон (U-17) дар марҳилаи ниҳоии Ҷоми Осиё-2025, ки аз 3 то 20 апрел дар Арабистони Саудӣ баргузор мешавад, ширкат мекунад. Рақибони наврасони кишвар дар гурӯҳ 23 январ дар қуръакашии мусобиқот маълум хоҳанд шуд.