Дар ҳамаи шаклҳои хоҷагидории ҷумҳурӣ истеҳсоли маҳсулоти растанипарварӣ зиёд шудааст.

Дар ин бора Иззатулло Сатторӣ, вазири кишоварзии ҷумҳурӣ, санаи 15 июл, зимни нишасти хабарӣ ба рӯзноманигорон иттилоъ дод.
Ба таъкиди номбурда маҳсулоти растанипарварӣ, аз ҷумла ғалладона ба 574 724 тонна, картошка 252 948 тонна, сабзавот 784 706 тонна, полизӣ 208 886 тонна, мевагиҳо 121 377 тонна ва ангур 1955 тонна баробар гардид, ки нисбат ба ҳамин давраи соли гузашта истеҳсоли ғалладона 62 243 тонна (112,1%), картошка 35 511 тонна (116,3%), сабзавот 65 520 тонна (109,1%), полизӣ 18 681 тонна (109,8%), мевагиҳо 19 939 тонна (119,7%) ва ангур 116 тонна (106,3%) зиёд мебошад. 

Дар идома гуфта шуд, ки дар ин давра ҳамчунин маҳсулоти чорводорӣ, аз ҷумла истеҳсоли гӯшт ба 73 996 тонна, шир 364 216 тонна, тухм 307,4 млн. дона, пашм 4703 тонна, асал 610,5 тонна ва моҳӣ 464,2 тонна расонида шудааст. Истифодаи самараноки имкониятҳо ба он мусоидат намуд, ки дар шаш моҳи соли ҷорӣ ҳаҷми умумии маҳсулоти кишоварзӣ дар ҳамаи шаклҳои хоҷагидории ҷумҳурӣ ба 7790 млн сомонӣ расонида шуд.