Дар натиҷаи санҷишҳои гузаронидашуда аз ҷониби мақомоти прокуратураи кишвар танҳо дар шаш моҳи аввали соли равон 190 нафар барои дуздии неруи барқ ба ҷавобгарии ҷиноятӣ ҷалб шудаанд.

Дар ин бора Прокурори генералии Ҷумҳурии Тоҷикистон Ҳабибулло Воҳидзода зимни нишасти хабарӣ иттилоъ дод.

Ба гуфтаи Воҳидзода, прокуророн дар ҷараёни санҷиши риоя ва иҷрои қонунгузорӣ дар самти истифодаи сарфакоронаи неруи барқ ҳолатҳои сершумори вайронкунии қонунро ошкор кардаанд. Аз ҷумла, ҳолатҳои дуздӣ ва талафи беасоси неруи барқ, тасарруфи таҷҳизот ва маблағҳои соҳавӣ, порагирӣ, ғайриқонунӣ аз эътибор соқит намудани қарздории муштариён, иваз кардани беасоси ҳисобкунакҳои барқӣ ва ворид намудани тағйирот ба барномаи биллингӣ сабт шудаанд.

Мақомоти прокуратура ҷиҳати бартарафсозии қонуншиканиҳои ошкоргардида 2326 амр, 221 пешниҳод ирсол намуда, 3813 нафарро ба ҷавобгарии интизомӣ, моддӣ ва маъмурӣ кашидаанд. Ҳамзамон, 175 парвандаи ҷиноятӣ оғоз гардида, зиёда аз 273 миллион сомонӣ қарзи неруи барқ аз муштариён рӯёнида шудааст.

Ф. УМАРАЛӢ. “ҶТ”