Зарари молиявии нисбатан калон ошкоршуда дар кишвар мансуби ҶСК "Фурӯдгоҳи байналмилалии шаҳри Душанбе" будааст, ки 262,8, млн сомониро ташкил медиҳад. Нисбати директори ин Фурӯдгоҳ Абдулло Исматулозода ва 21 нафар аз кормандони он парвандаи ҷиноӣ боз шудааст.

Дар ин бора Сулаймон Султонзода, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон 8 август зимни нишасти хабарӣ иттилоъ дод.

Ба гуфти ӯ, ҳамчунин шуъбаи бақайдгирии имтиҳоноти Раёсати бозрасии давлатии автомобилӣ ВКД ҶТ бо зарари молиявӣ дар ҳаҷми 270,7 млн сомонӣ, Раёсати адлияи вилояти Суғд ва зерсохторҳои он дар ҳаҷми 7,2 млн сомонӣ, КВД "Обу корези шаҳри Душанбе" 5,9 сомонӣ, филиали маркази барқугармидиҳӣ 2" ҶСК "Барқи Тоҷик" 5,9 млн сомонӣ ва филиали маркази барқу гармидиҳии 1" ҶСК "Барқи Тоҷик" 4,8 млн сомонӣ дар қатори коргоҳҳое, ки аз онҳо зарари молиявии нисбатан калон ошкор шудааст, шомиланд.

Зикр шуд, ки дар ҷумҳурӣ 1245 ҷинояти коррупсионӣ ва иқтисодии хусусияти коррупсионидошта нисбати 528 нафар ошкор гардидааст. Тафтиши пешакии 571 парвандаи ҷиноятӣ нисбати 528 нафар ба итмом расида, ба судҳо ирсол шудаанд.

- Дар маҷмуъ, дар шаш моҳи аввали соли равон Агентӣ аз рӯйи ҳамаи самтҳои фаъолият 661, 6 млн сомонӣ барқарор намудааст. Аз ин шумора 267, 9 млн сомонии он ба суратҳисоби буҷети давлатӣ ва 384 млн сомонӣ ба корхона ва ташкилоту муассисаҳои давлатӣ ва 9,7 млн сомонӣ ба ҷамъиятҳои ғайридавлатӣ ва шаҳрвандон барқарор шудаанд, - гуфт Султонзода.

С. ҚИЁМИДДИН, “ҶТ”