Ба озмуни "РАИЯТПАРВАР"

Ба маркази ноҳияи Роштқалъа норасида, дар деҳаи Анҷин, мобайни дарахтони сафедори дар як қатор сафкашида хонаҳои якнамуди рӯ дар рӯ қомат афрохтаанд. Деҳаи хурд, вале хеле зебову замонавӣ, манзарааш зебову дилкаш. Роҳи ҳамвору асфалтпӯш, ки аз байни хонаҳои қатор убур мекунад, аз ду тараф шабҳо чароғону равшан аст. Дар як тараф майдончаи варзишии замонавӣ ва майдони бозии кӯдакон сохта шудаву наврасони деҳа ҳамрӯза он ҷо бозӣ доранд. Бовари кас намеояд, ки чунин созандагӣ муддати як моҳ амалӣ гардидааст.

Ба гуфти сокини деҳаи Миденведи Ҷамоати деҳоти Барвози ноҳияи Роштқалъа Себарга Деҳқонов, шурӯъ аз 27 июни соли 2023 бо якбора гарм шудани ҳарорати ҳаво, аз доманакӯҳ сели калон муддати чанд рӯз ба тарафи деҳа сарозер шуда, хонаҳои истиқоматӣ ва дигар инфрасохтори деҳаро вайрону валангор намуд. Хушбахтона, офати табиӣ ба сокинони деҳа зарари ҷониро ба бор наовард. Вале дар натиҷаи офати табиӣ 15 хонаи истиқоматӣ қисман ва пурра, инчунин иншооти иқтисодӣ, аз ҷумла бунгоҳи тиббии деҳа, муассисаи таҳсилоти ибтидоии №28, роҳи автомобилгард, хатҳои оби нӯшокӣ ва интиқоли барқ, 5 канали обгузар хароб гардида, 880 бех дарахти мевадиҳандаю сояафкан, 3,5 га заминҳо, аз ин миқдор 2,5 га ғалладонагӣ, 0,5 га картошка ва 0,5 га сабзавот зери селу лойқа монданд.

Дар лаҳзаҳои нахустини сар задани офати табиӣ бо супориши бевоситаи Пешвои миллат муҳтарам Эмомалӣ Раҳмон комиссияи ҳукуматӣ аз ҳисоби роҳбарони вазорату кумитаҳои дахлдор ба маҳалли офати табиӣ сафарбар гардид.

Дар маҷмуъ, 31 хоҷагии зарардидаю зери хавфи эҳтимолӣ қарордошта фавран ба истироҳатгоҳи “Шабдез” – и деҳаи Анҷин, ки поёнтар аз маркази ноҳияи Роштқалъа мустақар аст, интиқол дода шуда, бо хӯрока ва ҷойи хоб таъмин шуданд. Техникаву механизмҳои зарурӣ бошанд, дар маҳалли офати табиӣ оқибатҳои онро бартараф мекарданд.

Хурду бузурги на танҳо вилоят, балки сокинони тамоми минтақаҳои кишвар, зери сиёсати муттаҳидкунандаи Сарвари миллат муҳтарам Эмомалӣ Раҳмон ба кумаки сокинони зарардида шитофтанд. Баъзе бо суханони неку самимӣ дар фазои маҷозӣ мардумро тасаллӣ медоданду бархеи дигар белу каланд дар даст ба тоза кардани роҳу иншоот машғул буданд.

Бо дастури Пешвои миллат муҳтарам Эмомалӣ Раҳмон Сарвазири мамлакат Қоҳир Расулзода ба ҷойи ҳодиса омад. Зимни мулоқот бо мардум, таъкид гардид, ки ҳамаи зарардидагон таҳти таваҷҷуҳи Ҳукумати Ҷумҳурии Тоҷикистон, хоса Роҳбари давлат қарор доранд ва хисороти молие, ки ба хонаводаҳои ин минтақа дар пайи офати табиӣ расидааст, аз тарафи Ҳукумати Ҷумҳурии Тоҷикистон пурра барқарор хоҳад шуд. Сарвазири мамлакат Қоҳир Расулзода ба 10 оилае, ки манзили зисташон пурра зери сел монданд, кумаки яквақтаинаи Роҳбари давлатро дар ҳаҷми 10 ҳазор сомонигӣ расонд.

Бо супориши Президенти мамлакат муҳтарам Эмомалӣ Раҳмон ба зарардидагони офати табиӣ миқдори муайяни маводи хӯрокворӣ, аз қабили орд, шакар, равған, биринҷ, марҷумак, нахӯд, макарон ва дигар маводи ниёзи аввал дастрас карда шуд. Селаи мошинҳои пурбор бо кумакҳои моддӣ қариб ҳамарӯза ба ноҳияи Роштқалъа рафтуо доштанд. Ҳамчунин, барои сохтмони манзилҳои истиқоматӣ дар марҳилаи аввал бо супориши Пешвои миллат муҳтарам Эмомалӣ Раҳмон масолеҳи сохтмонӣ дастрас гардид.

Муҳимтар аз ҳама, дар ҳузури Сарвазири кишвар лоиҳаи ангоравии бунёди хонаҳои нави истиқоматӣ барои зарардидагони офати табиӣ муаррифӣ карда шуд. Барои сокинони аз офати табиӣ зарардида дар деҳаи Анҷин беш аз 1 гектар замин ҷудо гардида, корҳои сохтмонӣ бо дастгирӣ ва таҳти таваҷҷуҳи Пешвои миллат оғоз ва дар муддати як моҳ бо сатҳу сифати баланд ба анҷом расонида шуданд. Баъди як моҳ, дар ҷойи як бешазор 10 манзили истиқоматии бо санъати муосири меъморӣ ороёфта, бунёд ва бо тамоми асбобу анҷоми рӯзгор, аз қабили яхдон, телевизор, мизу курсӣ, болишту кӯрпа, қолин ва ҳатто сӯзану ришта таъмин гардиданд.

Инак, лаҳзае фаро расид, ки сокинони аз офати табиӣ зарардидаи деҳаи Миденвед онро дер боз интизор буданд.

Санаи 16 августи соли 2023 бо пайу қадами мубораки худ, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари кории худ ба ВМКБ калидҳои хонаҳои нав-бунёдро ба соҳибонашон супориданд. Ҷаноби Олӣ зимни суҳбатҳои самимӣ бо сокинон иброз доштанд, ки Ҳукумати Ҷумҳурии Тоҷикистон ҷиҳати фароҳам сохтани шароити мусоиди зиндагӣ, пурра барқарор намудани хисороти расида ва бунёду таъмини хонаҳои замонавӣ бо тамоми ҷиҳоз ҳамеша тадбирҳои зарурӣ меандешад.

Қиноатшо Дарвешов, сокини солхӯрдаи деҳаи Миденвед, ки баъди ба коми сел рафтани хонаи истиқоматиаш соҳиби манзили нав гардида буд, бо ёдоварӣ аз он рӯзҳо гуфт, ки онҳо аз аввали сар задани офати табиӣ боварӣ доштанд, ки Ҳукумати кишвар, хоса Президенти мамлакат муҳтарам Эмомалӣ Раҳмон дар барашон ҳастанду мушкилашон ҳалли худро пайдо мекунад. Ин марди рӯзгордида бо ифтихор миннатдории самимии кулли сокинони деҳаи Миденвед-ро ба Пешвои маҳбуби миллат муҳтарам Эмомалӣ Раҳмон арз намуд.

- Вақте ки сел хонаҳои моро бурд, намедонистем чӣ кор кунем, ҳоламон чӣ мешавад. Офати тибиӣ моро ба қисматҳо ҷудо кард. Лекин моро ҳамон рӯз мисли кӯдаки гаҳвора гирифта, ба ҷойи амн оварданд. Чунон дар ҳақамон меҳрубонӣ карданд, ки ҳаргиз фаромӯш нахоҳем кард. Ба наздамон Сарвазири мамлакат омада, паёму саломи Президентро бароямон расонд. Аз ҳолу аҳволамон пурсон шуд. Ҳамаи инҳо бо дастури падаронаи Президенти кишвари маҳбубамон амалӣ гардид. Мо имрӯз сад бор шукрона мегӯем, ки дар муддати кутоҳ ба рӯзи нек расидем. Баъдан Ҷаноби Олӣ худашон омада, калидҳои хонаҳоро ба мо супурданд. Ман аз номи тамоми сокинон ба Президенти мамлакат миннатдории худро мерасонам, ки моро дар лаҳзаи ҳассос танҳо намонданд, - бо хушнудӣ изҳор кард Қ. Дарвешов.

Имрӯз, касе агар азми сафари ноҳияи Роштқалъаро дорад, ҳатман сари роҳ дар деҳаи Анҷин аз тамошои ин созандагӣ чашм канда наметавонад. Аҳли деҳа шабӯ рӯз дар ҳаққи ин шахсияти ободкор, Сарвари оқилу хирадманд, Қаҳрамони Тоҷикистон муҳтарам Эмомалӣ Раҳмон дуо мекунад, ки ҳамеша болои сари миллати бузурги тоҷик соябон бошанд ва бо муҳаббати хоса мегӯянд:

Аё Пешво,
Ало, эй Сарвари миллат,
Ало эй раҳкушову раҳнамову раҳбари миллат,
Аё Пешво,
Ало, эй соягустар чун ҳумои бахт,
Ба зери сояи дасти ту умри мо шукуфон аст,
Баҳори сарнавишту қисмати мардум гулафшон аст.
Биё, гарди пайи ту тутиёи дидагони мост,
Қудуми поки ту бар рӯи чашму қалби ҷони мост,
Аё Пешво,
Зи нав хуш омадӣ сӯи Бадахшонам,
Бадахшони тилоии ба роҳи дӯст, пазмонам,
Зи номи ҳар бадахшонӣ саломи гармтар аз шед,
Ба зери мақдами ту чун гули хуршед афшонам.
Аё Пешво,
Қудумат дар Бадахшони азизи мо ҳумоюн бод,
Ба рӯи мардуми мо омаданҳои ту шогун бод!

Садоншо ҶАНОБИЛШОЕВ, “ҶТ”