СИЁСАТ
Шанбе 13 Июл 2024 08:32
10350
15 май дар ноҳияи Панҷи вилояти Хатлон Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ҳамроҳ бо Рудобаи Мукаррам, раиси Кумитаи иҷроияи Ҳаракати ваҳдати миллӣ ва эҳёи Тоҷикистон, Генерал-майор Турабек Назарзода, муовини фармондеҳи Қӯшунҳои сарҳадии Кумитаи давлати амнияти миллии Ҷумҳурии Тоҷикистон, ва Шоҳиён Зарифхуҷа, раиси ноҳияи Панҷ бо сарбозону афсарони қисмҳои ҳарбии Вазорати мудофиа ва Қӯшунҳои сарҳадии Кумитаи давлатии амнияти миллӣ мулоқот карданд.

Ин мулоқот дар доираи нақша - чорабиниҳои якҷояи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Кумитаи иҷроияи Ҳаракати ваҳдати миллӣ ва эҳёи Тоҷикистон ва Қӯшунҳои сарҳадии Кумитаи давлатии амнияти миллии Ҷумҳурии Тоҷикистон бахшида ба 30 – солагии таъсисёбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ва Рӯзи ҷавонони Тоҷикистон баргузор шуд.

Зимни суханронии хеш Зулфиқор Гулаҳмадзода таъкид кард, ки Қӯшунҳои сарҳадӣ дар баробари дигар сохторҳои низомӣ ба як сохтори низомии муосир ва сипари боэътимоди ҳифзи марзу буми мамлакат табдил ёфта, аз ҷумлаи дастовардҳои бузурги замони соҳибистиқлолии Тоҷикистон ба шумор меравад. Он аз рӯзҳои нахустини таъсисёбии худ дар ҳифзи истиқлолу озодии Ватан, ҳимояи амнияти давлату ҷомеа ва зиндагии ороми мардум нақши босазо гузошта, дар мушкилтарин рӯзҳо барои ҳифзи марзҳои давлатӣ ва пешгирӣ кардани воридшавии гурӯҳҳои муташаккилу мусаллаҳи ҷиноятӣ, аслиҳа ва маводи мухаддир хизмати воқеан таърихӣ анҷом дод.

- Дар тули қариб се даҳсолаи мавҷудияти Қӯшунҳои сарҳадӣ барои ҳифзи марзу буми Ватан, барқарорсозии сохти конститутсионӣ, ҳимояи оромиву суботи мамлакат ва зиндагии осудаи мардуми Тоҷикистон ҳангоми иҷрои вазифаҳои хизматӣ, амалиёту муҳорибаҳои зиддитеррористӣ, мубориза бар зидди қочоқи силоҳу маводи мухаддир садҳо нафар хизматчиёни ҳарбии ҷузъу томҳои марзбон ҷони худро қурбон кардаанд. Мардуми тоҷик ва Ҳукумати мамлакат номи нек ва ҷасорату фидокории онҳоро ҳамеша гиромӣ хоҳанд дошт, -зикр кард раиси Кумита.

Гуфта шуд, ки торафт фаъол гардидани гурӯҳҳои террористиву экстремистӣ ва зуҳури гурӯҳҳои нави ҷинояткори фаромиллӣ тақозо менамояд, ки ҳар як сарбозу афсари бонангу номус ба хотири ҳимояи хоки муқаддаси Ватани азизамон ҳушёрии касбӣ ва зиракии сиёсиро аз даст надода, хизматро содиқона, бо эҳсоси гарми ватандорӣ ва дар сатҳи баланди касбӣ иҷро намояд.

Дар охир баромадкунандагон ҳамаи марзбонони далеру шуҷои кишвар ва муҳофизони Ватани азизамонро ба ифтихори 30-солагии таъсисёбии Қӯшунҳои сарҳадӣ ва Рӯзи ҷавонони Тоҷикистон самимона табрик гуфта, дар ҷодаи хизмати бошарафаташон баҳри ҳимояи марзҳои давлати соҳибихтиёри Тоҷикистон ва амнияти сокинони мамлакат барору комёбӣ орзу намуданд.

Баъд аз суҳбату суханрониҳо барои афсарону сарбозони шуҷои ватан дастархони идона ташкил карда шуд.

Эзоҳи худро нависед



Рамзҳо дар расм