Бахшида ба “Соли маърифати ҳуқуқӣ” ва 30 юмин солгарди Конститутсияи Ҷумҳурии Тоҷикистон дар беморхонаи марказии шаҳри Норак бо табибон вохӯрӣ доир гардид.

Дар ин бора Бахши кор бо ҷавонон ва варзиши шаҳри Норак иттилоъ медиҳад.

Гуфта мешавад, ки мақсад аз баргузории чунин вохӯриҳо баланд бардоштани маърифати ҳуқуқии аҳолӣ ба ҳисоб меравад.

Масъулин зимни суханронӣ изҳор намудаанд, ки Конститутсия нишонаи нахустин ва муҳимтарини соҳибистиқлолии давлат буда, аз ҷониби ҷомеаи ҷаҳонӣ ва кишварҳои дигар эътироф гардидани соҳибихтиёрии он аз ҳамин ҳуҷҷати тақдирсоз сарчашма мегирад.

Инчунин, зикр гардид, ки Конститутсия ҳамчун бахтномаи миллат ва санади бунёдии сиёсӣ роҳи минбаъдаи пешрафту тараққиёти давлати озоду демократии моро муайян менамояд.

“Сатҳи баланди ташвиқу тарғиби Конститутсия, қонунҳои амалкунандаи Ҷумҳурии Тоҷикистон ва дигар санадҳои меъёрии ҳуқуқӣ яке аз асосҳои болоравии маърифати ҳуқуқии аҳолии мамлакат буда, шароит фароҳам меорад, ки шаҳрвандон масъулиятнок бошанд, меъёрҳои Конститутсия ва қонунҳоро риоя намоянд, аз ҳуқуқҳои худ пурра истифода баранд ва дар ҷамъият рафтори шоиста дошта, худогоҳу ватандӯст бошанд”.

Ҳамзамон, таъкид гардид, ки барои бунёди ҷомеаи демократӣ зарур аст, ки дар баробари ҳамаи тадбирҳои дигари бунёдкорӣ ҳамагон ҳамчун шаҳрванд ҳуқуқу озодӣ ва вазифаҳояшонро дар сатҳи зарурӣ донанд ва бархӯрдор бошанд.