Соли 2024 дар Донишгоҳи технологии Тоҷикистон ба ғолибони озмунҳои ҷумҳуриявӣ ва байналмилалӣ мукофотпулӣ ва имтиёзҳо ташкил гардид, ки ин теъдоди донишҷӯёни иштирокчиро ба ин гуна озмунҳо бештар кард.

Дар ин бора Зоир Раҳмонзода, ректори донишгоҳи мазкур 31-уми январ зимни нишасти матбуотӣ иттилоъ дод.

- Дар баробари ин, барои ғолибони озмунҳои фаннӣ ҳангоми сазовор гаштани донишҷӯ ба ҷойи якум 100%, дуюм 75% ва сеюм 50% аз маблағи яксолаи таҳсил озод карда шуда, омӯзгороне, ки онҳоро ба ин озмунҳо омода менамоянд, 50 дарсади ин маблағҳоро сазовор мегарданд, - гуфт дар идома Зоир Раҳмонзода.

Номбурда ҳамчунин қайд кард, ки танҳо дар соли 2024 хонандагони Литсейи инноватсионии Душанбеи назди донишгоҳ дар озмуни ҷумҳуриявии "Илм - фурӯғи маърифат" ширкат варзида, 2 нафар соҳиби ҷойи 1-ум ва 3 нафар сазовори ҷойи 3-юм гардиданд. Як нафар докторанти донишгоҳ бошад, дар озмуни ҷумҳуриявии "Муҳаққиқ ва ихтироъкори ҷавон" сазовори ҷойи 3-юм шуд.

Ҳошим РАҲМАТУЛЛОЕВ, “ҶТ”