Аз 2 то 9 апрел дар Ҷумҳурии Тоҷикистон ҷашнвораи ҷумҳуриявии “Ҳафтаи китоби кӯдакону наврасони Тоҷикистон” зери унвони “Фурӯғи маърифат” баргузор мегардад.

Дар ин бора АМИТ “Ховар” бо истинод ба Вазорати фарҳанги Ҷумҳурии Тоҷикистон иттилоъ додааст.

Тибқи иттилоъ, ҷашнвора бо ташаббуси Вазорати фарҳанги Ҷумҳурии Тоҷикистон шуруъ аз 2-юми апрели соли равон оғоз гардида, он бо иштироки олимону адибон ва коршиносон дар шаҳри Душанбе ва шаҳру навоҳии тобеи ҷумҳурӣ давоми як ҳафта давом мекунад.

“Дар ҷашнвора намоиши маҳсули дасти кӯдакону наврасон, намоиш-фурӯши китобу рӯзнома ва маҷаллаҳои тозанашр, суҳбати кӯдакону наврасон бо адибон, сурат-далел аз ҷараёни баргузории ҷашнвораҳои гузашта, порчаҳо аз намоишҳои Театри давлатии ҷумҳуриявии "Лӯхтак" ва намоиши Сирки давлатӣ пешниҳоди иштирокдорон гардонида мешавад”, - омадааст дар хабар.

Мавриди ба ёдоварист, ки ҳамасола дар саросари дунё 2 апрел ҳамчун Рӯзи байналмилалии китоби кӯдакон таҷлил мегардад.

С. ИБОДЗОДА, “ҶТ”