Дар натиҷаи тадбирҳои андешидаи мақомоти андоз иҷрои нақшаи андозҳо ва дигар пардохтҳои ҳатмӣ дар соли 2025 ба андозаи 115,7 % таъмин гардида, ба буҷети давлатӣ 26 млрд 518,3 млн сомонӣ ворид шудааст. Дар ин бора имрӯз - 13 феврал Нусратулло Давлатзода, раиси Кумитаи андози назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Ба гуфти ӯ, дар давраи ҳисоботӣ иҷрои нақшаи воридоти андоз ва пардохтҳои ҳатмӣ дар Вилояти Мухтори Кӯҳистони Бадахшон 104,3 фоиз, вилояти Хатлон 103,1 фоиз, вилояти Суғд 107,1 фоиз, шаҳри Душанбе 119,8 фоиз ва дар шаҳру ноҳияҳои тобеи ҷумҳурӣ дар маҷмӯъ 109,5 фоиз таъмин гардидааст. Ҳамчунин, Раёсати андози андозсупорандагони калон нақшаро ба андозаи 114,8 фоиз иҷро намудааст.

Зикр гардид, ки ба ҳолати 1 январи соли 2026 бақияи қарзи андозҳо дар миқёси ҷумҳурӣ 1 млрд 91,7 млн сомониро ташкил дода, нисбат ба аввали соли 2025 ба маблағи 351,5 млн сомонӣ афзоиш ёфтааст.

Бо мақсади рӯёнидани маблағи бақияи қарзҳои андозӣ ва пешгирӣ аз зиёдшавии онҳо, дар ин давра мақомоти андоз нисбат ба андозсупорандагони қарздор 16,5 ҳазор қарор оид ба маҷбуран ситонидани андозҳо ба маблағи 1 млрд 914,3 млн сомонӣ қабул кардаанд. Дар натиҷа, аз ҳисоби қарорҳои қабулшуда дар соли 2025 ва қарорҳои солҳои қаблӣ, дар маҷмуъ ба буҷети давлатӣ зиёда аз 1 млрд 16,4 млн сомонӣ маблағ ворид гардидааст.

Малика МУҚАДДАМОВА, “ҶТ”