Мақомоти иҷроияи ҳокимияти давлатии шаҳри Душанбе нақша дорад, ки дар ояндаи наздик дар ҳудуди пойтахт мусофиркашониро танҳо бо нақлиёти барқӣ ба роҳ монад.

Дар ин бора имрӯз 26 июл Ҷамшед Табарзода, муовини аввали раиси шаҳри Душанбе зимни нишасти матбуотӣ хабар дод.

Ба гуфтаи ӯ танҳо дар нимсолаи аввали соли ҷорӣ барои хизматрасонӣ дар самти кирокашӣ (такси) ба Душанбе 2956 мошини барқӣ (элетромобил) ворид гардидааст.

Инчунин Табарзода илова кард, ки мақомот нақша дорад дар ояндаи наздик ба автобусҳо барқӣ ё электробусҳо гузарад.

- Ба ҳамин хотир то соли 2025 30 автобуси барқӣ ба пойтахт ворид карда мешавад ва дар марҳилаҳои баъдӣ пурра ба ин навъи нақлиёт хоҳем гузашт, - гуфт муовини аввали раиси шаҳр.

Ёдовар мешавем, ки бо як қарори вижаи раиси шаҳри Душанбе муҳтарам Рустами Эмомалӣ тамоми таксиҳои пойтахт бояд то сентябри соли 2025 ба нақлиёти барқӣ гузаранд.