Карим Азизов муовини директори телевизиони “Сафина” сабаби пахш нашудани барномаҳои ток-шоуро дар набудани журналисти ҳирфаӣ дар ин самт рабт дод.

Ӯ 22 июл зимни нишасти хабарии ин шабакаи телевизионӣ гуфт, ки ТОК-ШОУ жанрест, ки талаботи худро дорад ва журналисти он бояд суханрони хуб бошаду аудиторияро идора карда тавонад.

- Мо имсол тавассути пахши роликҳо эълон кардем, ки ҳар нафаре аз уҳдаи таҳияи ТОК-ШОУ ё дигар шакли барномаҳо ба хубӣ мебарояд метавонад идеяи худро пешниҳод кунад ва мо омодаем бо ӯ ҳамкориро шуруъ кунем. Аммо мутаассифона пешниҳодҳо қариб, ки набуданд- гуфт Карим Азизов.

Ҳамчунин ӯ зикр дошт, ки бо вуҷуди ин телевизиони “Сафина” ҳоло ду лоиҳаро дар жанри ТОК-ШОУ рӯйи даст дорад ва ба наздикиҳо пешниҳоди бинандагон хоҳад шуд.

Ин дар ҳолест ки ҳанӯз ду сол қабл зимни нишасти телевизиони “Сафина” гуфта шуда буд, ки тамошобинони ин шабакаи телевизионӣ бештар барномаҳои ток-шоу ва ҳаҷвиро дархост мекунанд ва ҳайати эҷодии телевизиони Сафина талош мекунанд чунин барномаҳоро ба намоиш гузоранд.

Сайёраи ҚИЁМИДДИН, “ҶТ”