Шуруъ аз 25 то 27 ноябри соли равон дар доираи баргузории Рӯзҳои фарҳанги Ҷумҳурии Беларус дар Тоҷикистон рӯзҳои синамои Беларус доир мегарданд. Дар ин хусус Муассисаи давлатии “Тоҷикфилм” хабар медиҳад.

Тибқи иттилоъ, рӯзҳои синамои Беларус 25 ноябр, соати 17:00 дар кинотеатри “Наврӯз” оғоз гардида, дар ин рӯз филми ҳунарии “Қалъаи сиёҳ” намоиш дода мешавад.

Ҳамзамон, рӯзи 26 ноябр, соати 10:00 дар кинотеатри ба номи Тоҳир Собиров филми мустанади “Орзуи қаҳрамон” ва соати 17:00 филми тасвирии “Суруди Сирен” намоиш дода хоҳад шуд.

Инчунин, дар доираи баргузории рӯзҳои синамои Беларус бо иштироки коргардони филмҳои тасвирӣ ва филмноманавис Елена Турова барои хоҳишмандон дар Мактаби синамогарони ҷавон - “Навомӯз”, Донишкадаи давлатии фарҳанг ва санъати Тоҷикистон ба номи Мирзо Турсунзода, Донишгоҳи славянии Русия ва Тоҷикистон дарсҳои “Устод ва шогирд” гузаронида мешаванд.

Ёдовар мешавем, соли равон маротибаи дуюм аст, ки рӯзҳои синамои Беларус дар Тоҷикистон доир мегарданд.

Ҷасури ҚИЁМИДДИН, "ҶТ"