Бахшида ба соли ҷавонон 28 апрел, дар Муассисаи таҳсилоти миёнаи умумии №34 ноҳияи Исмоили Сомонии шаҳри Душанбе, бо ташаббуси Бахши ҷавонон, варзиш ва сайёҳии ноҳияи мазкур, фестивал-озмуни ноҳиявӣ байни ҷавондухтарон таҳти унвони “Нигоҳи нав ба муди ҷавонон” баргузор гардид.

Дар ибтидои чорабинӣ зикр гардид, ки “Мо тоҷикон – миллати соҳибтамаддун ва аз лиҳози фарҳангу маънавиёт бой имконият дорем, ки дар арсаи байналмилалӣ муаррифгари арзишҳои неки умумибашарӣ бошем”.

Гуфта шуд, ки мақсад аз баргузории чорабинӣ баланд бардоштани маърифати фарҳангии ҷавонон, инкишофи ҳисси ватандӯстӣ, садоқат ба Ватан, арҷгузорӣ ба таърих ва тамаддуни халқи тоҷик, тарғиби либосҳои миллӣ ва даст кашидан аз фарҳанги бегонапарастӣ мебошад.

Иштирокчиёни чорабинӣ дар панҷ бахш- “либосҳои миллии расмӣ барои ҷавонон”, “либосҳои миллӣ барои шабнишинӣ”, “либосҳои миллӣ барои ҳаррӯза”, “либосҳои арусӣ бо тарҳи миллӣ” ва “рӯймолҳои тоҷикона ва тарзу усули истифодаи онҳо” баромад намуда, ғолибон ба фестивали шаҳрӣ роҳхат гирифтанд.

Беҳрӯз ХОЛМУРОДОВ, “ҶТ”