Имрӯз - 28 июл дар нишасти хабарии МД “Тоҷикфилм” гуфта шуд, ки наворбардории филмии ҳунарии “Дурахши ахтарон: Ҷомӣ ва Навоӣ” аз 1 августи соли равон оғоз шуда, дар ҳудуди кишвар то охири моҳи сентябр идома меёбад.

Маҳмадсаид Шоҳин, директори муассисаи мазкур зикр дошт, ки айни ҳол гурӯҳи асосӣ барои давраи омодагии филм такмил ёфта, филмномаро саҳна ба саҳна ба таври гурӯҳӣ мавриди хониш қарор дода, аз рӯи он интихоби ҳунармандону сохтани реквизитҳову декорҳо дастрасӣ ва омодасозии маводи зарурӣ ва дӯхтани либоси қаҳрамонони филм ҷараён дошта, боздид аз мавзеъҳои сабти филми ҳунарии мазкур сурат гирифт.

Наворгирии филм дар ҳудуди Узбекистон бошад, моҳҳои октябр ва ноябр сурат гирифта, дар назар аст, ки то ҷашни Наврӯз филм пешниҳоди тамошобинон гардад.

Таъкид шуд, ки то ба имрӯз ҳамчун реквизит, ки шумораи он тақрибан 6500 адад ба нақша гирифта шудааст, 1500 нусха китоб, 1650 дона реквизитҳои гуногун: (шамъдон, номаҳо, лавх, тоқчаҳо, миз, курсӣ, халта, гӯшвор, гарданбанд, тарозу, кӯзаҳо, кошуқ, пиёлаву қандил ва дигар лавозимотҳо) ҷамъоварӣ ва сохта шуданд.

Ҳамчунин, барои қаҳрамонони филм 750 адад либос, 400 адад ҷомаҳои гуногун омода шуда, 300 адад тоқӣ тайёр аст ва 350 адад пойафзолҳо омода карда шудаанд.

Ёдовар мешавем, ки ин филми муштарак роҷеъ ба муносибатҳои дӯстона ва рӯзгори ибратбахши Мавлоно Абдураҳмони Ҷомӣ ва Мир Алишери Навоӣ буда, ба хотири тарғиби анъанаҳои дӯстиву бародарии ду миллат таҳия мегардад.

Гулафшон КАРИМОВА, “ҶТ”