Пешвои миллат муҳтарам Эмомалӣ Раҳмон чанде пеш зимни мулоқот бо сокинони вилояти Суғд таъкид намуданд, ки бояд тамоми мардуми кишвар рӯзҳои баҳориро самаранок истифода бурда, дар фикри зиёд кардани истеҳсоли маҳсулоти кишоварзӣ, коркарди ҳарчӣ бештари маҳсулот ва ба содирот баровардани он бошанд.

Аксари мардуме, ки дар ягон муассисаи давлатӣ кор мекунанд, бештари вақти рӯзҳои истироҳатиашонро дар заминҳои наздиҳавлигии худ мегузаронанд. Қариб ҳар рӯзҳои истироҳат дар маҳаллаҳо маъракае доир мегардад. Аз рӯи расму анъананаи қавмдорӣ агар ба маъракае даъват намоянд, рафтан зарур аст. Бо гармшавии ҳаво касоне ки субҳи барвақт ба замини “президентӣ” ё иҷоравӣ мераванд, маҷбуранд соати 8-9-и субҳ боз ба маъракаи ҳамдеҳаашон оянд. Баъд аз маърака бинобар гарм будани ҳаво дубора ба кори саҳро рафта наметавонанд.

Бинобар ин хуб мешуд, ки ба Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” каме тағйирот ворид намуда, оғози баргузории маъракаҳоро аз моҳи апрел то октябр соати 6:00-и субҳ муқаррар намоянд. Зеро аз таҷрибаи солҳои пешин аён аст, ки субҳи барвақт дар мавсими гармо оғоз шудани маърака ҳам барои соҳибмаърака ва ҳам барои меҳмонон қулай мебошад Соҳиби маърака низ дар салқинӣ меҳмононро гусел намуда, кораш сабук мешавад.

Азбаски қариб 70 дарсади сокинони мамлакат дар деҳот зиндагӣ мекунанд, соати 6-и субҳ оғоз шудани маъракаҳо талафи вақти боғдорону зироаткоронро пешгирӣ хоҳад кард.

Алишери САЙФИДДИН.