Ҷиҳати амалисозии бандҳои алоҳидаи Қонуни Ҷумҳурии Тоҷикистон “Дар бораи танзими чашну маросим дар Ҷумҳурии Тоҷикистон вобаста ба ҷилавгирӣ аз бегонапарастӣ ва манъи ба бар кардани либоси ба фарҳанги мо бегона Вазорати фарҳанги кишвар тасмим гирифтааст, ки китоби либосҳои тавсиявиро барои шаҳрвандони кишвар таҳия ва нашр намояд.

Дар ин хусус имрӯз 22 июл Обид Назариён, муовини аввали вазири фарҳанги Ҷумҳурии Тоҷикистон зимни нишасти матбуотӣ ба хабарнигорон иттилоъ дод.

Ӯ гуфт, ки китоби мазкур шакли такмил ва таҳриршудаи “Дастурамали либосҳои тавсиявӣ барои духтарон ва занон дар Ҷумҳурии Тоҷикистон” мебошад, ки соли 2018 чоп шуда буд. Дар китоб илова ба либосҳои тавсиявии занона тарҳи либосҳои тавсиявии мардона низ ворид карда шудааст, ки бо дарназардошти арзишҳои миллӣ ва ба фарҳанги миллии мо хос пешниҳод мешаванд.

Ёдовар мешавем, ки масъалаи ба бар кардани либосҳои ба фарҳанги мо бегона чандин сол аст, ки дар расонаҳои кишвар ва сегменти тоҷикии шабакаҳои иҷтимоӣ мавриди баҳсу баррасӣ қарор мегирад. Дар соли 2018 замони дар раъси Вазорати фарҳанги кишвар қарор доштани Шамсиддин Орумбекзода як дастурамал таҳия шуда буд. Ахиран дар соли 2022 Зулфия Давлатзода вазири фарҳанги вақти кишвар ваъда дода буд, ки либосҳои тавсиявӣ барои мардонро таҳия месозанд.