Дар Донишгоҳи давлатии омӯзгории Тоҷикистон ба С. Айнӣ бахшида ба Рӯзи Модар мизи мудаввар доир гардид, ки дар он муовини аввали Кумитаи ҷавонон, варзиш ва сайёҳи назди Ҳукумати ҷумҳурӣ Мавсума Муинӣ , сардори Раёсати ҷавонон Аҳмадзода Дилноза, муовни ректори ДДОТ Рано Бобокалонова ва устодону донишҷӯдухтарони донишгоҳи мазкур ширкат варзиданд.

М. Муинӣ ҳозиринро ба Рӯзи Модар табрик намуда, аз саҳми занон дар пешрафти мамлакат ёдовар шуд:

- Имрӯз занон дар ҳама соҳа баробари мардон кору фаолият доранд. Ин пеш аз ҳама ғамхории Сарвари давлат мебошад, ки имрӯз ба занон чунин имкониятҳоро фароҳам овардааст. Ҳамин буд, ки дар Паёми худ ба Маҷлиси Олӣ Пешвои миллат қайд намудаанд, ки дар рушди ҳаёти иҷтимоӣ нақши занон ва ҷавонон ҳамчун нерӯи пешбарандаи ҷомеа ниҳоят арзишманд мебошад”.

Дар чорабинӣ ҳамчунин донишҷӯдухтарон дар васфи модар шеъру тарона хонданд. Дар охири нишаст донишҷӯдухтарони ДДОТ ба муносибати Рӯзи Модар аз тарафи Кумитаи ҷавонон, варзиш ва сайёҳӣ бо тӯҳфаҳои хотиравӣ қадрдонӣ шуданд.