Ба ифтихори Рӯзи матбуот 11-март дар китобхонаи марказии шаҳри Ҳисор чорабинии бошукӯҳе доир гардид.Шарифҷон Ҷумазода, иҷрокунандаи вазифаи Раиси шаҳри Ҳисор  аҳли қаламро бо иди касбиашон муборакбод гуфта, ба онҳо дар фаъолияташон комёбиҳо таманно намуд.

-Имрӯз дар ҷумҳурӣ 355 рӯзнома, 255 маҷалла, 11 оҷонсии иттилоотӣ ва 70 муассисаи телевизиону радио ба қайд гирифта шудааст-гуфт Шарифҷон Ҷумазода.- Дар шаҳри Ҳисор рӯзномаи “Ҳисори Шодмон”, маҷаллаҳои “Маорифи Ҳисор” ва “Ҳисори Зарнисор” ба табъ расида, инъикосгари ҳаёти сокинон ва таърихи ин диёри бостонианд. Мо бояд тавассути суханони созанда  ҳамватанонамонро ба ободкорӣ, тозагидӯстдорӣ, риояи ахлоқи ҳамида, ватанпарварӣ роҳнамоӣ кунем.

Шарифҷон Ҷумазода зимни сӯҳбати озоду самимӣ бо журналистони зодаи Ҳисор, ки дар расонаҳои хабарии ҷумҳуриявию хориҷӣ кор мекунанд, иброз дошт, ки ба наздикӣ Мақомоти иҷроияи ҳокимияти давлатии шаҳри Ҳисор соҳиби сомонаи махсус мешавад. Дари  мақомот барои ҳама муроҷиаткунандагон, минҷумла рӯзноманигорон боз буда, дар гирифтани иттилоот ягон маҳдудият нест.

Аҳли матбуот бигзор камбудию мушкилоти ҷойдоштаро инъикос намуда роҳҳои ҳалли онро нишон диҳанд. Масалан, дар шаҳри Ҳисор, ки 285 000 аҳолӣ дорад, ҳамагӣ 8 муассисаи томактабӣ амал мекунад. Иддае кӯдаконашонро бинобар набудани ҷой ба боғчаҳои пойтахт мебаранд.Чаро соҳибкорон дар бунёди боғчаҳои хусусӣ иқдом намекунанд?

-Пӯшида нест, ки дар соҳаҳои маориф тандурустӣ, роҳу нақлиёт ва ғайра баъзе камбудиҳо ҷой доранд- гуфт  Шарифҷон Ҷумазода. – Аз ин рӯ масъалаҳои доғи рӯзро инъикос кунед, то камбудиҳо саривақт ислоҳ шаванд. Мо ҳама бояд якдил шуда, баҳри ободии диёр кӯшиш намоем.

Дар поёни чорабинӣ иҷрокунандаи Раиси шаҳри Ҳисор ба як қатор журналистон барои фаъолияти хубашон сипоснома ва тӯҳфаҳои хотиравӣ супурд.