Дар Иттифоқи нависандагони Тоҷикистон рӯнамоии китоби тозанашри “Чакомаи ҳанӯз” доир гардид. Ин маҳфил 1 май бо иштироки раиси Фарҳангистони шеъри ҷаҳон, Шоири халқии Тоҷикистон Гулрухсор Сафиева, Нависандаи халқии Тоҷикистон Абдулҳамид Самад, муовини раиси Иттифоқи нависандагони Тоҷикистон Ато Мирхоҷа ва дигар намояндагони аҳли адаб баргузор шуд.

Китоби “Чакомаи ҳанӯз” намунаи шеъри шоираҳои ҷавон буда, аз сӯи Фарҳангистони шеъри ҷаҳон, таҳти назари Шоири халқии Тоҷикистон Гулрухсор Сафиева нашр шудааст.

Мураттибии онро Шоҳбегим Маликзода, узви Иттифоқи нависандагони Тоҷикистон ва муҳарририи онро узви дигари ҳамин иттифоқ Бузургмеҳри Ҳаким ба дӯш доштаанд.

Зимни маҳфил гуфта шуд, ки китоби “Чакомаи ҳанӯз” ашъори 18 бонуи шоирро фаро мегирад, ки номи аксари онҳо барои хонандагон чандон шинос нест.

Дар ин маҷмуа шеърҳои Рӯъё Усмонӣ, Шаҳёд Шарифзода, Санавбар Ибодова, Шукрона Тоҳирӣ, Омина Ҳамроева, Фаридаи Давлат ва дигарон гирдоварӣ шудааст.