- Шеъри шоир зиндагиномаи ӯст. Ҳар як мисраи эҷодкарда порчае аз зиндагии шоирро дар бар мегирад. Агар шумо мехоҳед аз ҳаёти шоирон бохабар шавед, эҷодиёти онҳоро мутолиа кунед. Аз ҷумла ҳар мисраи эҷодкардаи ман лаҳзае аз зиндагиам мебошад, - иброз дошт Муҳаммад Ғоиб зимни маҳфили адабӣ - фарҳангӣ.

Маҳфили мазкур 16  май, дар толори бинои марказии Донишгоҳи милии Тоҷикистон бо ташаббуси Кумитаи кор бо ҷавонон ва варзиши назди Ҳукумати кишвар бо иштироки Шоири халқии Тоҷикистон, барандаи Ҷоизаи давлатии ба номи А. Рӯдакӣ Муҳаммад Ғоиб баргузор гардида, дар он намояндагони Кумитаи кор бо ҷавонон ва варзиш, ҳунармандону адибони шинохта, сарояндагони саршиноси кишвар, намояндагони ДМТ, эҷодкорони ҷавон ва донишҷӯёну ҷавонони фаъол иштирок намуданд. 

Маҳфили адабӣ - фарҳангӣ таҳти унвони “Ҷавонии шоир бо ҷавонон” бахшида ба Рӯзи ҷавонони Тоҷикистон доир шуда, дар он шоири халқӣ Муҳаммад Ғоиб бо аҳли толор, ки аксарияташон ҷавонон буданд, аз ҳаёти ҷавонии худ қисса намуд.

Маҳфил бо пешниҳоди саҳнаи бадеӣ аз ҷониби ҳунармандони ҷавони маҳфили “Лабханди ҷавонӣ”-и Кумитаи кор бо ҷавонон ва варзиш дар бораи Муҳаммад Ғоиб шуруъ гардид. 

Сипас, Муҳаммад Ғоиб ба Кумитаи кор бо ҷавонон ва варзиш ҷиҳати ташкили маҳфили адабӣ – фарҳангӣ миннатдорӣ намуда, аз эҷодиёташ порчаҳои шеърӣ қироат намуд ва ба аҳли толор аз даврони кӯдакӣ ва чи гуна ба шеър рӯ оварданаш ёдовар шуд. Дар идомаи маҳфил аъзоёни Маҳфили эҷодкорони ҷавон аз ашъори ин шоири шинохта порчаҳои шеърӣ қироат намуданд. Ҳамчунин, сарояндаҳои маъруфти кишвар Давлатманд Холов, Файзалӣ Ҳасан, Зикриоллоҳ Ҳакимов ва ғайраҳо аз эҷоди шоир сурудҳо хонданд.  

Аслиддин Низомов, мусиқишинос, доктори илми санъатшиносӣ зимни баромади худ дар васфи шоири халқӣ Муҳаммад Ғоиб гуфт, ки шеъри ӯ аз ниёзҳои мардум маншаъ мегиранд ва тамоми эҷодиёташ моро даъват ба созандагию бунёдкорӣ мекунад.

- Шеърро суруд мондагор ва дар дили халқ ҷой мекунад. Умқи шеър замоне дарк мешавад, ки ба он оҳанг мебанданду онро месароянд. Дар ин асно шеър бояд дорои мазмуни баланд ва арзанда бошад. Шеъри Муҳаммад Ғоиб худ суруд аст. Ҳамин аст, ки аксарияти сарояндаҳои кишвар шеърҳои ӯро оҳанг бастаанд, - гуфт дар идомаи суҳбат Аслиддин Низомов. 

Аҳтам Абдуллозода, раиси Кумитаи кор бо ҷавонон ва варзиш, дар фарҷоми маҳфили адабӣ - фарҳангӣ аз меҳмони он ва дигар нафароне, ки дар чорабинӣ иштироки фаъолона доштанд, изҳори миннатдорӣ намуда, иброз дошт: “Ашъори Муҳаммад Ғоиб саршор аз меҳру муҳаббати ватандорист. Дар маркази ашъораш тарғиби ҷавонмардӣ, ҳифзу гиромидошти арзишҳо ва ғурури миллӣ меистад. Шеърҳои устод мардумианд. Аз ин рӯ, ҳар мисраи он ба дил чун малҳам менишинад”.