6 май Федератсияи байналмилалии футбол (ФИФА) рейтинги ҷаҳонии дастаҳои футзалро миёни дастаҳои миллӣ эълон кард, ки бар асоси ин раддабандӣ тими миллии футзали Тоҷикистон бо касби 1167,37 хол дар байни 139 кишвари ҷаҳон зинаи 34-умро соҳиб гашт.

Дар панҷгонаи ин раддабандӣ кишварҳои ба мисли Бразилия, Португалия, Испания, Иран ва Аргентина меистанд. Тоҷикистон бо мақоми 34-ум як зина пеш аз давлати Қувайт ва як зина поинтар аз Ветнам аст.

Ба навиштаи расонаҳо Федератсияи байналмилалии футбол барои аввалин бор дар таърих аст, ки чунин як раддабандиро расонаӣ мекунад. Дар асоси ҳамин раддабандӣ тими миллии футзали Тоҷикистон дар миёни тимҳои футзали давлатҳои Осиё зинаи 8-умро соҳиб шудааст.

Ёдовар мешавем, ки аз рӯйи натиҷагирии Ҷоми Осиё-2024, ки чанде пеш дар Бангкок ба анҷом расид, мунтахаби Тоҷикистон таҳти роҳбарии Пайрав Воҳидов мақоми чаҳорумро касб карда, бори аввал дар таърихи худ соҳиби роҳхат ба чемпионати ҷаҳон гардид. Ҷоми ҷаҳон имсол аз 14 сентябр то 6 октябр дар Ӯзбекистон барпо мегардад. Дар Ҷоми Осиё-2024 дар Тайланд футзалбозони Тоҷикистон шаш вохӯрӣ анҷом доданд. Дастаи мо дар марҳилаи гурӯҳии мусобиқот бар тими Кореяи Ҷанубӣ (2:0) пирӯз шуда, инчунин бо дастаҳои Қирғизистон (2:2) ва Ҷопон (1:1) мусовӣ карданд. Дастаи Пайрав Воҳидов дар даври чаҳорякниҳоии мусобиқот бар Афғонистон (2:1) зафар ёфт. Футзалбозони мо дар даври ниманиҳоӣ аз тими миллии Тайланд (вақти асосӣ – 3:3, аз рӯйи пеналти – 5:6) ва дар бозӣ барои ҷойи севум аз тими миллии Ӯзбекистон (вақти асосӣ – 5:5, аз рӯйи пеналти – 1:3) шикаст хӯрданд.