Имрӯз - 16 апрел дар рӯзи аввали мусобиқоти қаҳрамонии ҷудои Осиё, ки дар шаҳри Ордоси Чин ҷараён дорад, Эмомалӣ Нуралӣ паҳлавони тоҷик дар вазни то 66 кг барандаи медали тиллои мусобиқа ва қаҳрамони Осиё шуд.

Варзишгарони тоҷик Эмомалӣ Нуралӣ ва Обид Ҷебов дар вазни то 66 кг рақибони худро шикаст дода, ба финал баромаданд. Эмомалӣ Нуралӣ дар финал бар ҳамватани худ Обид Чебов ғалаба карда, соҳиби нишони тилло гардид. Обид Чебов бошад, бо нишон додани ҳунари баланд ва муборизаҳои пуршиддат то даври ниҳоӣ расида, медали нуқраро ба даст овард.

Ҳамчунин, имрӯз варзишагри дигари тоҷик Мадина Қурбонзода дар вазни то 52 кг ба гирифтани медали биринҷӣ даст ёфт. Ӯ дар мубориза барои ҷои сеюм Тсуи Шук аз Чинро шикаст дод.

Бо ҳамин, варзишгарони тоҷик дар рӯзи аввали мусобиқоти қаҳрамонии ҷудои Осиё се медал – 1 тилло, 1 нуқра ва 1 биринҷӣ гирифтанд.

Тоҷикистонро дар қаҳрамонии ҷудои Осиё, ки то 18-уми апрел идома меёбад, имсол 13 варзишгар (9 мард ва 4 зан) муаррифӣ мекунанд.

Имрӯз се ҷудокори дигари тоҷик - Меҳрзод Суфиев (дар вазни то 60 кг), Аҳлия Муъминова (дар вазни то 48 кг) ва Александра Кан (дар вазни то 57 кг) низ рақобатҳои худро баргузор карданд, вале онҳо дар марҳилаҳои гуногун ноком ва аз медалҳо маҳрум шуданд.

Ёдовар мешавем, ки варзишгарони тоҷик бори охир соли 2017 аз қаҳрамонии Осиё медали тилло ба даст оварда буданд. Ин нишонро Комроншоҳи Устопириён аз они худ карда буд.