Имрӯз зимни нишасти хабарӣ Усмон Маҳмадёрзода, ректори Донишгоҳи аграрии Тоҷикистон ба номи Шириншоҳ Шоҳтемур, иттилоъ дод, ки айни замон донишгоҳ бо 130 муассисаи таҳсилоти олии кишварҳои дуру наздик шартномаю созишнома ва бо 40 муассисаи хориҷӣ ёддошти тафоҳум оид ба ҳамкорӣ дошта, шумораи умумии санадҳои ҳамкории байналмилалӣ ба 170 адад расидааст.

Ӯ афзуд, ки дар давраи ҳисоботӣ 4 ёддошти тафоҳум ва 6 созишномаи нави ҳамкорӣ ба имзо расонида шудааст.

Ба гуфтаи ӯ, дар доираи созишнома бо ширкати KOTA Seed Potato Co., Ltd. оид ба рушди соҳаи агросаноатӣ, дар Корхонаи воҳиди таълимию таҷрибавии "Ҳисор"-и назди Донишгоҳ сохтмони ду гармхона бо масоҳати умумии 1760 метри мураббаъ пурра ба анҷом расидааст.

Ҳамчунин, айни замон Донишгоҳи аграрии Тоҷикистон 12 лоиҳаи байналмилалии грантиро дар ҳамкорӣ бо ташкилотҳои бонуфузи байналмилалӣ ва донишгоҳҳои шарики кишварҳои Аврупо ва Осиёи Марказӣ амалӣ намуда истодааст.

Гулафшон КАРИМОВА, “ҶТ”