Шаб буд. Осмони Кӯлобшаҳр пурситора. Онҳо чашмак зада, манзараи нотакрореро мемонданд. Мардум баъди кори рӯзона сар рӯйи болини хоби ноз монда буд. Ҳама ҷо орому сокит. Шаб аз нисф гузашт. Дар дили шаб дар осмон якбора пораҳои абр пайдо шуданд. Онҳо лаҳза ба лаҳза бузург шуда, рӯйи моҳи тобонро мепӯшонданд. Боди маҳин-маҳин вазидаистода ба тундбод табдил ёфт. Он бӯйи нофорамеро ба димоғ мерасонд. Дар осмон, мисли он ки сангҳои хурду бузург бо ҳам бармехӯрда бошанд, садои воҳимаоваре баланд шуд. Осмони шаҳрро абри сиёҳ пурра пӯшонд ва раъду барқ ба атроф рӯшанӣ меандохт.

Суръати шамоли сард боз ҳам бештар мешуд. Донаҳои борон ба замин мерехтанд. Лаҳзае пас борони пуршиддат борид. Мардуми масти хоб дар ғафлат монда буд. Борони сел хасу хошок ва сангро бо худ оварда, чун аждаҳо ҳамаро ба коми худ мекашид. Соате нагузашта қисме аз кӯчаи Чармгарони поёни шаҳр зери об монд, лойқа рӯйи ҳавлии сокинонро зер кард. Об порча-порча талу теппа ва ҷариҳоро канда, болои боми хонаҳои истиқоматӣ мерехт.

Гиряву нола ва имдодталабии занону модарон гӯё осмонро мешикофт. Мардҳо белу каланд дар даст бо ин офат мубориза мебурданд. Аммо ин ҳама беҳуда буд. Дар ин лаҳзаҳо фалокат зӯртар аз инсон буд.

Кӯдакону калонсолон ва чорвои хонагӣ ба коми об мерафтанду волидон илоҷи онҳоро наҷот додан надоштанд. Шаби даҳшатангез рӯз шуд. Модарони фарзандгумкарда ҷигарбандонро ҷӯё мешуданд.

Офат кори худро кард. Нахустин фавтидагон, хонаю дари ба замин яксоншудаю зери лойқа монда. Ин буд, натиҷаи офати табиӣ.

Баъди рух додани офати табиӣ Президенти ҷумҳурӣ, Роҳбари раиятпарвар муҳтарам Эмомалӣ Раҳмон оҷилан ба ҷойи ҳодиса омаданд. Дардошнои мардуми Кӯлоб ва ноҳияҳои зарардида гардиданд. Ҳар як шахси мусибатдидаро дилбардорӣ мекарданд ва дар дидагонашон донаҳои ашк ҷорӣ мешуд. Ба мардум гуфтанд: “Дарду мусибати шумо дарду мусибати ман аст. Шумо танҳо нестед, шуморо танҳо намегузорем, ман ҷони инсонҳоро баргардонда наметавонам, аммо то сӯзани шуморо барқарор мекунам”.

Ин суханони пурҳикмати Пешвои миллат ба захмҳои мардуми зарардида малҳам шуданд ва онҳо ба ояндаи неки худ боварӣ ҳосил мекарданд.

Бар асари ин офати табиии даҳшатбор дар шаҳри Кӯлоб зиёда аз 7 нафар ҷони худро аз даст дода, 40 нафар захмӣ шуд, хонаҳои истиқоматӣ зиёни ҷиддӣ дида, 2,5 ҳазор гектар заминҳои кишт, 150 км роҳҳои мошингард ва 12 пул пурра хароб гашт. Ҳамчунин, офати табиӣ ба ноҳияҳои Восеъ, Муъминобод ва Шамсиддини Шоҳин низ хисороти зиёд овард.

Зимни мулоқоту суҳбатҳо бо мардуми зарардида Пешвои миллат муҳтарам Эмомалӣ Раҳмон ба аҳли оила ва наздикони шахсони ҳалокшуда изҳори тасаллияту ҳамдардӣ карда, аз аҳолӣ даъват намуданд, ки руҳафтода набошанд ва онҳоро бовар кунонданд, ки тамоми хонаҳои вайроншуда пурра барқарор карда мешаванд.

Президенти мардумӣ ба ниҳодҳои дахлдор дастуру супориш доданд, ки дар кӯтоҳтарин муддат дар ҷойҳои бехавф баҳри бунёди маҳаллаҳои нави аҳолинишин барои оилаҳои бесарпаноҳмонда замин ҷудо карда шавад ва сохтмони манзилҳои нав оғоз ёбанд. Таъкид гардид, тамоми оилаҳое, ки хонаҳояшон вайрон шудааст, бояд соҳиби хонаҳои нав бо тамоми ашёи рӯзгор шаванд.

Маҳз ҳамин суханони таскинбахши Роҳбари давлат дар ин лаҳзаҳо ба ҷароҳати қалби мусибатдидаҳо даво буд. Мардум аз Пешвои миллат барои тасаллият ва дастгириҳояшон миннатдорӣ менамуданд.

Бунёди беш аз 600 хона танҳо дар шаҳри Кӯлоб ва ба як шаҳраки муосир табдил ёфтани ин гӯшаи шаҳр аз ҳидоят, роҳнамоӣ ва ғамхориҳои Пешвои миллат далолат мекунанд.

Дар маросими ифтитоҳи хонаҳои истиқоматӣ ва мактаб барои 1200 нафар хонанда дар маҳаллаи навбунёд Пешвои миллат иштирок карданд. Таъмини аҳолӣ бо оби нӯшокӣ, қувваи барқ, роҳҳо, бунгоҳи тиббӣ ва дигар хизматрасониҳои комунналӣ барои сокинони аз офати табиӣ зарардида аз иқдомҳои хайрхоҳонаи Пешвои маҳбубу мардумсолор буд, ки дар як давраи кӯтоҳ ба мардум дастрас карда шуд.

Маврид ба ёдоварист, ки зимни ҳар як сафар Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳо пеш аз ҳама бо оростани зиёфати идона бо ятимони кул вохӯрӣ анҷом дода, ба ҳар як нафари онҳо кӯмакҳои хайрхоҳона, аз қабили сару либос, лавозимоти хониш ва ба суратҳисобашон маблағҳо мерасонанд.

Айни замон дар ҳудуди вилоят 14 мактаб - интернат фаъолият менамояд, ки 8 адад мактаб-интернати кӯдакони ятим мебошад. Дар заминаи ғамхориҳои Пешвои миллат мактаб - интернатҳо азнавсозӣ гардида, тамоми шароити таҳсилу будубош дар муассисаҳои таълимӣ муҳайё карда шудааст.

Тамоми табақаи ҷомеа, бахусус ҷавонони вилояти Хатлон дастгириҳои пайвастаи Пешвои миллатро ҳамеша эҳсос менамоянд ва дар пайравӣ ба мактаби давлатдории Президенти Ҷумҳурии Тоҷикистон муҳтарам Эмомалӣ Раҳмон баҳри пешрафту шукуфоии кишвар саъю талош доранд.

Давоми солҳои соҳибистиқлолӣ дар тамоми соҳаҳо, бахусус самти кор бо ҷавонон ва варзиши вилоят дигаргуниҳои куллӣ ба миён омада, дастгирӣ дар ин самт бесобиқа рушд дорад.

Барои мо, ҷавонони вилояти Хатлон ҳаёт ва фаъолияти Пешвои миллат муҳтарам Эмомалӣ Раҳмон намунаи олии ватандӯстӣ, хизмат ба Ватан ва ҷомеа, вафо ба қавлу амал мебошад.

Ҷавобан ба ғамхориҳои Роҳбари кишвар, ҷавонони вилояти Хатлон дар атрофи Пешвои миллат муҳтарам Эмомалӣ Раҳмон муттаҳид гардида, Истиқлолу якпорчагии Ватани азизамонро ҳифз менамоянд.

Рамазон НАСРИДДИНЗОДА,
сардори Раёсати
кор бо ҷавонон ва варзиши
вилояти Хатлон