Бахшида ба 35-солагии Истиқлоли давлатии Ҷумҳурии Тоҷикистон аз 6-уми июн то 23-юми августи соли 2026 ҳар ҳафта рӯзҳои шанбе ва якшанбе дар боғҳои шаҳри Душанбе рӯзҳои фарҳанги шаҳру ноҳияҳои мамлакат баргузор мегарданд.

Дар ин бора АМИТ “Ховар” хабар додааст.

Бино ба иттилоъ, тибқи “Ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон барои соли 2026”, ки бо Амри Президенти Ҷумҳурии Тоҷикистон тасдиқ шудааст, рӯзҳои фарҳангӣ давоми сол тибқи нақшаи алоҳида гузаронида мешаванд.

Кормандони шуъбаҳои фарҳангии вилоятҳо ва шаҳру ноҳияҳои ҷумҳурӣ дар ин рӯзҳо бо пешниҳоди барномаи ҷолиби консертӣ, намоиши молу маҳсулот ва ҳунарҳои мардумӣ сокинон ва меҳмонони пойтахтро шод мегардонанд.

Гуфта мешавад, рӯзҳои фарҳангӣ дар Боғи фарҳангию фароғатии “Кӯли ҷавонон”, Боғи фарҳангию фароғатии ба номи Садриддин Айнӣ, Боғи фарҳангию фароғатии ба номи Абулқосим Фирдавсӣ ва дигар боғҳои фарҳангии пойтахт баргузор мегарданд.

Шаҳноза АЗИМОВА, “ҶТ”