Сомон Сангов, варзишгари ҷавону умедбахш, дорандаи медали нуқраи чемпионати ҷаҳон дар шаҳри Сербия аз намуди самбо, ғолиби чемпионати Осиё ва қаҳрамони Тоҷикистон дар вазни 52 кг дар соли 2020 мебошад.

Сомон ҳамагӣ 22 сол дорад. Ӯ аз синни наврасӣ ба варзиш машғул буда, то инҷониб дар намуди самбо ҳунарнамоӣ мекунад. Тамринҳои нахустини ӯ аз мактаби варзишии деҳаашон дар ноҳияи Ёвон оғоз ёфтаанд. Сомон мегӯяд, ки шавқи варзишгар шуданро дар дилаш маҳз волидонаш бедор кардаанд. Чун падараш орзуи варзишгар шудани Сомонро дошт, пайваста ӯро ба мактаби варзишии деҳа барои гӯштингирӣ мебурд ва ана ҳамон давутоз ва кашмакашиҳои паҳлавонони деҳааш ӯро дилбохтаи роҳи варзиш гардонид. Акнун Сомон ҳар рӯзи нав бо завқу умеди варзишгари муваффақ гардидан, роҳ сӯйи мактаби варзишии деҳаро мегирифт.

Чунончи ӯ мегӯяд: “Шавқи зиёди падарам маро дар ин роҳ пойбарҷо намуд ва акнун худро бе варзиш тасаввур карда наметавонам”. Устоди аввалини худ дар ин роҳ мураббии шоистаи ҷумҳурӣ Хушвахт Раҳимовро меҳисобад ва натиҷаи ҳамаи муваффақиятҳояшро аз устодаш медонад: “Воқеан, устод Хушвахт Раҳимов нафаре мебошад, ки тамоми нозукиҳо, сирри муваффақият ва роҳу равиши ин намуди варзишро ба ман омӯзондааст, ки миннатдории худамро ба устод мерасонам”, - меафзояд Сомон.

Аввалин мусобиқае, ки Сомон иштирок намудааст, соли 2015 дар худи зодгоҳаш мебошад, ки миёни мактабҳои варзишии ноҳияашон ӯ дар вазни 52 кг сазовори ҷойи аввал гардид. Баъди ғолиб гардидан дар мусобиқаҳои ноҳия Сомон имкон пайдо намуд, ки дар мусобиқаҳои сатҳи ҷумҳурӣ иштирок намояд ва заҳмату талошҳояш низ бенатиҷа намонд. Ӯ бори аввал дар сабқати ҷумҳуриявии самбо дар соли 2015 сазовори ҷойи аввал шуд. Акнун Сомон баъди ба даст овардани чунин натиҷа барои расидан ба орзуҳояш бештар талош менамуд ва умеди қаҳрамони ҷаҳон шуданро дар дил мепарварид. Ӯ бори дуввум соли 2016 унвони қаҳрамони Тоҷикистонро дар вазни 52 кг ба даст овард. Ҳамчунин, соли 2016 Сомон имкони иштирок дар мусобиқаи қитъаи Осиёро пайдо намуд ва миёни давлатҳои ИДМ дар шаҳри Москва дар вазни 52 кг медали биринҷии мусобиқотро ба даст овард, ки бори аввал хориҷ аз кишвар бе натиҷа ба Ватан барнагашт.

Дар соли 2017 Сомон дар Чемпионати Осиё, ки дар шаҳри Тошкант баргузор шуда буд, бар ҳама ҳарифҳои худ дастболо гардида, унвони қаҳрамони Осиёро дар вазни 52 кило ба даст овард.

Соли 2017 Сомон дар чемпионати ҷаҳон оид ба самбо, ки дар Сербия доир гардид, тавонист медали нуқраи қаҳрамонии ҷаҳонро дар ин ришта ба даст биёрад. Ҳамчунин, соли 2018 дар чемпионати ҷаҳон, ки дар шаҳри Тифлиси Гурҷистон баргузор гардид, медали биринҷии мусобиқотро ба даст овард.

Ҳар соле, ки аз ҳаёти Сомон сипарӣ мегардад, бенатиҷа намемонад. Ӯ соли 2019 медали нуқраи чемпионати ҷаҳонро бори севум дар вазни 52 кг дар шаҳри Тошкант ба даст овард.

Соли 2020 бо вуҷуди бемории ҳамагири COVID-19 ва таъсири пандемияи сартосарӣ Сомон низ як муддат аз тамринҳои даставӣ дур монд, ки дар рушди маҳорати варзишии ӯ бетаъсир набуд. Вале новобаста аз мушкилиҳои мавҷуда, ӯ тавонист дар мусобиқаи ҷумҳуриявии мамлакат аз намуди самбо медали тиллои мусобиқаро сазовар гардад. Имрӯз Сомон донишҷӯи соли чоруми Донишкадаи тарбияи ҷисмонии Тоҷикистон ба номи Саидмумин Раҳимов аст. Ӯ мегуяд: “Умед ва мақсади ягонаам қаҳрамони ҷаҳон шудан аст”.

Қиёмиддин МАҲМАДҶОНОВ
“ҶТ”