Имрӯз, 28 ноябр, дар шаҳри Хоруғ бо иштироки Шаҳзод Раҳимов, сардори Раёсати кор бо ҷавонони Кумитаи кор бо ҷавонон ва варзиши назди Ҳукумати кишвар ва дигар намояндагони ин ниҳод ҷаласаи ҷамъбастии фаъолияти Раёсати кор бо ҷавонон ва варзиши ВМКБ баргузор гардид.

Дар ҷаласа ҳамчунин Сураҷ Чоршанбиев, сардори Раёсати кор бо ҷавонон ва варзиши вилоят, кормандони раёсату мактабҳои варзишии вилоятӣ, мудирони бахшҳои кор бо ҷавонон ва варзиш ва директорони муассисаҳои варзишии шаҳру вилоят ширкат намуданд.

С. Чоршанбиев оид ба фаъолиятҳои нӯҳмоҳаи Раёсати кор бо ҷавонон ва варзиши вилоят дар соли 2018 ва вазифаҳо барои фаъолияти минбаъда ахборот дода, аз ҷумла гуфт, ки давоми сол варзишгарони вилоят дар 40 мусобиқаҳои варзишии ҷумҳуриявӣ ширкат намуда, 212 медалро ба даст оварданд. Аз ин теъдод 48 медали тилло, 65 нуқра ва 99 адад медали биринҷӣ мебошанд. Ҳамчунин варзишгарони вилоят дар 12 мусобиқаи байналмилалӣ иштирок карда, 28 медалро соҳиб гаштанд, ки аз инҳо 11 медали тилло, 6 нуқра ва 11 биринҷӣ мебошад.

Қайд шуд, ки дар баъзе ҳолатҳо маҳз норасоии маблағ боис мегардад, ки варзишгарони вилоят дар мусобиқаҳои байналмилалӣ ширкат карда наметавонанд.

Шаҳзод Раҳимов, сардори Раёсати кор бо ҷавонони Кумитаи кор бо ҷавонон ва варзиш изҳор дошт, ки барои масъулини раёсату бахшҳои шаҳр ва навоҳии ВМКБ лозим аст, то чорабиниҳои сиёсӣ, маърифатӣ, варзишию фарҳангиро тақвият бахшида, дар баргузории машқҳои солимгардонӣ, мусобиқаҳои оммавӣ аз аввала бештар мусоидат кунанд.

Ҳамзамон Ш. Раҳимов кору фаъолият, норасогию монеаҳоро дар самти фаъолияти Раёсати кор бо ҷавонон ва варзиши вилоятро як - як таҳлил карда, баҳри бартараф намудани тамоми мушкилиҳои ҷойдошта супориш дода, вақти муайян муқаррар намуд.