Имрӯз таҳти ин унвон дар Донишгоҳи технологии Тоҷикистон бо иштироки Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамоиш баҳри татбиқи сиёсати давлатии ҷавонон ва тарбияи ватандӯстии шаҳрвандон доир гардид.

Дар оғози ҳамоиш Гулаҳмадзода Зулфиқор гуфт, ки имрӯз бо дастгирии ҳамешагии Сарвари давлат муҳтарам Эмомалӣ Раҳмон барои ҷавонон тамоми шароитҳои инкишофу рушд фароҳам оварда шудааст.

“Пас ҳар яки мо бояд аз он истифода барем. Ва аз тамоми қишрҳои ҷомеа тақозо менамоям, то эҳсоси ватандӯстии худро тақвият бахшанд ва баҳри ҳифзи арзишҳои миллию давлатдорӣ дар талош бошанд. Зеро маҳз ватандӯстию арҷ гузоштан ба арзишҳои миллӣ маҳаки асосии пойдории ҳар як давлату миллат дар замони зудтағйирёбанда ба ҳисоб меравад,”- гуфт раиси Кумита.

Ҳамчунин дар ҳамоиши мазкур номояндагони Вазорати маориф ва илми Ҷумҳурии Тоҷикистон, Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, Кумитаи кор бо занон ва оилаи назди Ҳукумати Ҷумҳурии Тоҷикистон иштирок ва суханронӣ намуданд.

Гуфта шуд, ки бо назардошти пайомад ва хатару таҳдидҳои фаъолияти ташкилотҳои террористӣ ва гурӯҳҳои ифротӣ дар баробари мақомоти дахлдор, инчунин аз тамоми ҷавонони кишвар ва шаҳрвандон тақозо мегардад, ки ҷиҳати мубориза бо ин зуҳуроти номатлуб тамоми дониш ва неруи худро истифода бурда, силсилаи тадбирҳои судманду муассирро ба роҳ монанд.

Наҷиба МУРОДБЕКОВА, “ҶТ”