8 октябр, бо ибтикори Кумитаи ҷавонон, варзиш ва сайёҳии назди Ҳукумати ҷумҳурӣ дар Амфитеатри «Боғи Ирам»-и пойтахт “Гулчини сурудҳои ватандӯстона” бахшида ба 25-солагии Истиқлолияти давлатии Ҷумҳурии Тоҷикистон, доир гардид, ки дар он аз тарафи хизматчиёни ҳарбии Қувваҳои мусаллаҳи Ҷумҳурии Тоҷикистон сурудҳои ҳарбию ватандӯстона сароида шуд.



Дар ифтитоҳи чорабинӣ Аҳтам Абдуллозода, раиси Кумитаи ҷавонон, варзиш ва сайёҳӣ иброз дошт: “Суруд, санъат ва фарҳанг дар ҳаёти сарбоз нақши муассир дорад. Дар муборизаҳо бо аҷнабиён суруди сарбозӣ ҳамчун як нерӯи таҳкимбахш ва ҳамчун қувваи бузурги пешбаранда ба артиш хизмат мекард”.

- Ҳадаф аз баргузории ҳамоиш мустаҳкам кардани меҳру муҳаббат дар замири насли наврасу ҷавон ба Ватан ва масъулияти онҳо барои ҳифзи ин кишвари маҳбуб мебошад. Муҳофизати Ватан муҳофизати нангу номуси миллат аст, - афзуд дар идомаи суханаш А. Абдуллозода.

Дар фарҷом ба сарояндагон туҳфаҳои хотиравӣ ва “Сипоснома”-и Кумитаи ҷавонон, варзиш ва сайёҳӣ супорида шуд.