Наврасе боҳуш ва зирак. Боистеъдоду табиатан ором. Дилсӯзу меҳрубон. Кумакрасони дигарон. Ҳам волидон ва ҳам атрофиён. Дар ақида ва хостаҳои худ устувор. Бомасъулият ва илмдӯст. Ҳамеша ҳузур дорад, дар дарсҳо. Ҳатто агар рӯзи пеш олимпиадаеро гузаронида бошад. Шинохташуда аст бо чунин хислатҳо миёни ҳамагон.

Ин навраси боистеъдод Олимҷон Тухтаров мебошад. Ӯ айни ҳол дар синфи нуҳуми филиали муассисаи таълимии хусусии Литсей-интернати тоҷикӣ-русии “Ҳотам ПВ”-и шаҳри Ҳисор мехонад. Доимо пайи андӯхтани дониш аст. Фанҳои математикаву информатикаро бештар дӯст медорад. Барояш масъала ва мавзуъҳои фанҳои мазкур ҷолиб ва шавқоваранд. Баъзан барои ҳалли масъалае соатҳо фикр мекунад. Ҳатто то ними шаб.

“Замоне, ки масъалаеро ҳал мекунам, эҳсоси хубе дорам. Агар масъалаи шавқовар бошад, новобаста аз замон ба он фикр мекунам. Баъзан то ними шаб ба чи гуна ҳал намудани он машғул мешавам. Агар натавонистам, баъд аз устодон мепурсам. Бо вуҷуди ин, аз ҳалли он лаззат мебарам”, - мегӯяд ӯ.

Вақте ба суроғаш рафтем, машғули дарсхонӣ буд. Бо хандаҳои самимӣ моро пешвоз гирифт. Ва суҳбати гарме бо мо анҷом дод.
Замоне, ки ба муассисаи таълимии хусусии Литсей-интернати тоҷикӣ-русии “Ҳотам ва П.В”-и шаҳри Душанбе омад, хонандаи синфи сеюм буд. Рӯзҳои аввал барояш чандон осон набуд. Зеро ӯро лозим меомад, то зиёд дарс хонад. Кӯшиш намояд, то ба сатҳи дигар рафиқонаш бирасад. Тӯли шаш моҳ то дергоҳи шаб дарс тайёр мекард. Албатта, бо мададу дастгирии волидон. Тавонист баъд аз шаш моҳ ба қатори дигарон дохил шавад. Ва аз синфи панҷум ба филиали муассисаи мазкур дар шаҳри Ҳисор интиқол ёфт.

- Волидонам ҳамаи шароитҳоро барои таълими босамар фароҳам овардаанд. Ҳамеша дар барам ҳастанду барои ҳар кӯмаке омодаанд, - изҳор медорад Олимҷон.

Қаҳрамони мо баробари волидон, аз заҳмати устодон низ ёдовар мешавад. Ва нақши онҳоро дар муваффақиятҳои худ муҳим мешумораду аз онҳо изҳори миннатдорӣ менамояд.

Шумораи озмуну олим-пиадаҳои иштироккардааш зиёд аст. Чи дохилӣ ва чи хориҷӣ. Ҳангоми дар синфи ҳафтум хондан, дар олимпиадаҳо, аз қабили IMC (international mathematic competition) иштирок намудаву сазовори медали нуқра, JBMO -2022 (junior balkan mathematic olympiad) сазовори медали биринҷӣ ва IGO-2022 (Iranian geometry olympiad) сазовори медали тилло гардидааст.
Соли гузашта дар 19-умин Олимпиадаи байналмилалии Жаутиков “IZHO – 2023” соҳиби медали биринҷӣ ва ҳамчунин дар 64-умин Олимпиадаи ҷаҳонии математикӣ - IMO (International Matematical Olympiad 2023), ки 2-13-уми июли соли гузашта дар шаҳри Тибаи Ҷопон доир гардида буд, миёни зиёда аз 112 кишвари дунё ва 600 толибилм аз саросари ҷаҳон, сазовори ҷойи сеюм ва медали биринҷӣ гардидааст.

Соли равон бошад, дар 20-умин Олимпиадаи байналмилалии Жаутиков “IZHO – 2024”, ки рӯзҳои 8 – 13 январ дар шаҳри Алмаатои Ҷумҳурии Қазоқистон миёни 16 кишвари дунё ва беш аз 600 довталаб баргузор гардид, аз фанни математика сазовори ҷойи сеюм ва медали биринҷӣ шуд. Дар озмунҳои дохилӣ бошад, пайваста иштирок менамояду ҷойҳои намоёнро касб мекунад.

Ин ҳама иштирок дар озмуну олимпиадаҳо барояш таҷриба, хотираҳои хуб, муҳимтар аз ҳама дӯстони хубе, ки маслиҳатҳои судмандаш медиҳанд, ҳадя намудааст. Хусусан, шаффоф баргузор шудани олимпиадаҳо барояш бештар хушоянд аст. Зеро ӯ нафарест, ки он ҳама медалу дипломҳоро, ҳам дар олимпиадаҳои дохилӣ ва ҳам хориҷӣ бо талош ва дониши худ ба даст овардааст.
- Бо иштирок дар олимпиадаҳо метавон таҷриба касб намуд, хатоҳои худро дарёфт. Ҳамчунин дӯстони хубро пайдо карда будам, ки маслиҳатҳо медоданд, то беҳтар барои олимпиада тайёр шавам. Аз тамошои кишварҳо ва шаффофии чунин олимпиадаҳо таассуроти хеле хуб дорам, - хушҳолона мегӯяд ӯ.

Баъзан берун аз дарс ҳамроҳи дӯстон ба бозии футбол, бозии шоҳмот, хондани китобҳои бадеӣ ва расмкашӣ машғул мешавад. Аслан ин навраси боҳуш ҳамеша машғули дарсхонист. Суҳбат бо одамони донишмандро дӯст медорад. Замоне, ки дар бораи онҳо ба модараш мегӯяд, чашмонаш медурахшанд.

Ният дорад, баробари математика инчунин информатикаро ҳам бештар аз худ кунад. Вақтҳои холӣ пайваста ба дигар ҳамсолонаш дар тайёр намудани дарсҳо кумак мерасонад.

Бо мақсади дастгирии чунин хонандагони болаёқат литсей ӯро аз пардохти шартномаи таҳсил озод ва бо хобгоҳи ройгон таъмин намудааст.

Қаҳрамони мо аллакай идеали зиндагии худро пайдо кардааст. Идеалаш бо вуҷуди касби дигар доштан, шахсест дилсӯзу ғамхор ва кумакрасон ба дигарон. Ӯ мехоҳад мисли шахси идеалаш бошад. Идеалаш футболбоз Криштиано Роналдои машҳур аст.

- Бисёр мехоҳад, ки бо Роналдо вохӯрад. Вақте шунид, ки ӯ ба Тоҷикистон меояд, ду чипта барои худу падараш харид. Хеле хушҳол буд, ки ӯро мебинад. Чун эълон шуд, ки намеояд, ҳатто ба тамошои бозӣ нарафт, - мегӯяд модари қаҳрамони мо Гулрухсор.

Волидон ва устодонаш интизориҳои зиёде доранд аз ӯ. Худаш бошад, талош дорад, то барномасози хубе дар оянда шавад.

- Писарам дарсхониро зиёд дӯст медорад. Ҳатто рӯзҳои истироҳат низ машғули дасру тамрин аст. Агар дарс надошта бошад, танҳо ба дидорбинии бибиаш меравад. Дар корҳои хона маро кумак мерасонад. Ва ҳамеша бо ханда вориди хона мешавад. Ин хислатҳояш бароям писанд аст. Умед дорам, ки дар оянда қуллаҳои аз ин ҳам баландтарро фатҳ менамояду самараи заҳматҳои кашидаашро мебинад, - изҳор дошт, модараш Гулрухсор.

- Ӯ ҳам меҳнатдӯст ва ҳам боистеъдод аст. Фанни математикаро дӯст медораду пайваста пайи омӯзиш аст. Агар ҳамин хел идома диҳад, албатта ояндаи хубе ӯро интизор аст. Вай баъзе масъалаҳоро аз ман, ки 50 сол собиқаи корӣ дорам, беҳтар ҳал мекунад, - афзуд Умед Ҳилолович, яке аз устоди Олимҷон.

Умед мебандем, ки ҳамаи орзуҳои ин навраси боистеъдод ҷомаи амал мепӯшанд. Ва дар ин росто барояш барор мехоҳем.

Гулафшон КАРИМОВА, “ҶТ”