Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар шаҳри Ҳисор ба 12 бо фарзанди содиқи Ватан, ки бо азму иродаи қавӣ ду сол хизмати Ватан – Модарро иҷро намуда, сарбаландона аз хизмати ҳарбӣ рухсат шудаанд, вохӯрӣ доир намуд.

Дар ин бора аз дафтари матбуотии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Ба иттилои манбаъ, дар вохӯрӣ гуфта шуд, ки ҳимояи марзу буми Ватан ва обод гардонидани он вазифаи имониву виҷдонии ҳар шаҳрванди мамлакат, бахусус ҷавони бонангу номуси миллати тоҷик ба ҳисоб меравад. Он ҳамчун омили муҳими тарбияи ватандӯстӣ ва рукни асосии ҷавонмардӣ аз насл ба насл мерос мондааст.

Ҳамчунин гуфта шуд, ки барои садоқат ба Ватан ва бо ҳисси баланди масъулиятшиносиву ватандӯстӣ анҷом додани хизмати ҳарбӣ, инчунин бахшида ба Рӯзи ҷавонони Тоҷикистон ба 12 хатмкардаи мактаби ҷасорат Сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва туҳфаҳои хотиравӣ тақдим гардид.

Ҳамзамонон, сарбозон бо хушнудӣ иброз намуданд, ки бояд ҳар ҷавони бо нангу номус ба хизмати ҳарбӣ рафта, муҳофизатгари ин кишвар бошад.

Наҷиба МУРОДБЕКОВА, “ҶТ”