11 март дар доираи таҷлили Рӯзи матбуоти тоҷик аҳли эҷоди Муассисаи давлатии рӯзномаи “Ҷавонони Тоҷикистон” аз ҷониби раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода бо сипоснома ва туҳфаҳои хотиравӣ қадрдонӣ гардиданд.

Маросими қадрдонӣ дар бинои Кумитаи кор бо ҷавонон ва варзиши назди Ҳукумати Ҷумҳурии Тоҷикистон баргузор гардида, дар он саҳми рӯзноманигорон дар инъикоси фаъолияти сиёсати давлатии ҷавонон, тарғиби арзишҳои миллӣ ва муаррифии дастовардҳои давлату миллат ва варзиш таъкид шуд.

Зулфиқор Гулаҳмадзода, раиси Кумита аҳли эҷодро ба муносибати Рӯзи матбуоти тоҷик табрик намуда, барои онҳо дар фаъолияти минбаъдаи касбӣ комёбиҳо таманно кард.

Зимни суханронии худ раиси Кумита нақши воситаҳои ахбори оммаро дар рушди ҷомеа муҳим арзёбӣ намуда, изҳор дошт:

“Воситаҳои ахбори омма яке аз рукнҳои муҳими ҷомеаи демократӣ ба шумор мераванд. Маҳз тавассути фаъолияти пурмасъулияти рӯзноманигорон дастовардҳои давлату миллат ба мардум расонида шуда, афкори ҷомеа дар самти созандагӣ ва ватандӯстӣ ташаккул меёбад”.

Ӯ инчунин таъкид кард, ки рӯзномаи “Ҷавонони Тоҷикистон” дар инъикоси масъалаҳои муҳими ҳаёти ҷавонон, тарғиби сиёсати давлатии ҷавонон ва баланд бардоштани маърифати ҷомеа саҳми арзанда мегузорад.

Дар идомаи чорабинӣ кормандони рӯзномаи “Ҷавонони Тоҷикистон” барои фаъолияти самаранок, саҳми арзанда дар рушди журналистика ва инъикоси мавзуъҳои муҳими иҷтимоӣ бо сипоснома ва туҳфаҳои хотиравии Кумитаи кор бо ҷавонон ва варзиши назди Ҳукумати Ҷумҳурии Тоҷикистон сарфароз гардонида шуданд.

Яҳё МАҲМАДНАБИЕВ, “ҶТ”