Дар нимсолаи аввали соли ҷорӣ ба Тоҷикистон 748,3 ҳазор шаҳрванди хориҷӣ ташриф овардаанд, ки аз ин нишондод 580,5 ҳазор нафарашон ҳамчун сайёҳ (тибқи талаботи Созмони умумиҷаҳонии сайёҳӣ) ворид гардиданд, ки ин нисбат ба ҳамин давраи соли гузашта 19,1 фоиз зиёд мебошад.

Дар ин хусус 5 август Камолиддин Муминзод, раиси Кумитаи рушди сайёҳии назди Ҳукумати Ҷумҳурии Тоҷикистон зимни нишасти матбуотӣ ба хабарнигорон иттилоъ дод.

Гуфта шуд, ки ин сайёҳон аз 129 кишвари ҷаҳон ба кишвари мо ворид шудаанд. Шумораи шаҳрвандони аз ИДМ ба Тоҷикистон воридшуда 687,8 ҳазор нафар (аз ин 530,6 ҳазор нафар ба ҳайси сайёҳ), аз давлатҳои хориҷи дур 60,5 ҳазор нафар (аз ин 49,9 ҳазор нафар ба ҳайси сайёҳ)-ро ташкил медиҳанд.

Дар идома таъкид гардид, ки дар нимсолаи якуми соли ҷорӣ 214 ширкати сайёҳӣ фаъолият намудааст, ки аз ин 41 адад дар ВМКБ, 101 адад дар Душанбе, 46 адад дар вилояти Суғд, 17 адад дар вилояти Хатлон ва 9 адад ба шаҳру навоҳии тобеи марказ рост меояд.

Ба гуфти масъулини Кумита афзоиш ёфтани шумораи сайёҳон ба кишвари мо ин далели рушди соҳа дар Тоҷикистон ва дар арсаи байналмилалӣ ҳамчун кишвари амнтарин дар дунё шинохта шудани кишвари мо мебошад.

Шаҳло ЭШОНОВА, “ҶТ”