Соли 2023 дар шаҳру ноҳияҳои ҷумҳурӣ мувофиқи маълумотҳои оморӣ 10 768 иншооти варзишӣ новобаста аз шакли моликияташон ба қайд гирифта шудааст.

Дар ин бора 12-уми феврал Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни нишасти матбуотӣ хабар дод.

Бино ба таъкиди раиси Кумита аз ин миқдор иншооти варзишӣ 126 варзишгоҳ, 7479 майдончаи варзишӣ, 2214 толори варзишӣ, 94 ҳавзи шиноварӣ, 84 маҷмааю марказҳои солимгардонӣ ва 771 иншооти махсуси варзишӣ, аз қабили тир, боулинг, фитнес ва клубҳои ихтиёрӣ мавҷуд мебошанд, ки фаъолияти пурсамар доранд.

Гуфта шуд, ки давоми соли 2023 дар шаҳру ноҳияҳои ҷумҳурӣ 117 иншооти варзишӣ, аз ҷумла 87 майдончаи варзишӣ, 25 толори варзишӣ, 2 ҳавзи шиноварӣ ва 3 маҷмааи варзишӣ ва солимгардонӣ бо харҷи 60 миллиону 159 ҳазору 451 сомонӣ сохта ба истифода дода шудааст, ки аз ин 14 миллиону 602 ҳазору 951 сомонӣ аз ҳисоби маблағҳои буҷавӣ ва 45 миллиону 556 ҳазору 500 сомонӣ аз ҳисоби соҳибкорону сарпарастон мебошад.

- Соли 2023 дар самти тарбияи ҷисмонӣ ва инкишофи варзиш – 38 734 чорабинӣ бо иштироки 3 миллиону 599 ҳазору 810 нафар, аз ҷумла 402 ҳазору 133 нафар бонувон, инчунин 2 миллиону 129 ҳазору 670 нафар мухлисон доир карда шуд, ки ин шумора аз лиҳози теъдод нисбат ба соли 2022, 4026 чорабинӣ ва аз лиҳози фарогирӣ 100 008 нафар зиёд мебошад, - иброз дошт Зулфиқор Гулаҳмадзода, раиси Кумитаи кор бо ҷавонон ва варзиш.

Раиси Кумита дар идома иброз дошт, ки давоми соли 2023 аз ҷониби Кумита ва ташкилотҳои ҷамъиятии федератсияҳои варзишии кишвар 1186 нафар варзишгар, аз ҷумла 226 бонуи узви дастаҳои мунтахаби Ҷумҳурии Тоҷикистон аз намуди варзиши олимпӣ ва ғайриолимпӣ ба 112 мусобиқаи сатҳи байналмилалии варзишӣ сафарбар гардида, дар натиҷа ба хазинаи варзишии кишвар аз намуди олимпӣ ва ғайриолимпии аз ҷониби Шурои олимпии Осиё эътирофшуда 343 медал, аз ҷумла 108 тилло, 76 нуқра ва 159 биринҷӣ ворид гардид. Илова карда шуд, ки аз намуди дигари ғайриолимпӣ 358 медал ворид шуд, ки аз ин 95 тилло, 112 нуқра ва 151 биринҷӣ мебошад.

Аз шумораи умумии медалҳои ба дастовардаи варзишгарони кишвар, 2 тилло, 1 нуқра ва 4 биринҷӣ аз Бозиҳои Осиёӣ, 1 тилло, 3 нуқра ва 9 биринҷӣ аз Бозиҳои ИДМ, 47 тилло, 46 нуқра ва 72 биринҷӣ аз чемпионатҳои Ҷаҳон, 24 тилло, 33 нуқра ва 54 биринҷӣ аз чемпионатҳои Осиё, 16 тилло, 14 нуқра ва 19 биринҷӣ аз ҷоми Ҷаҳон, 12 тилло, 12 нуқра ва 5 биринҷӣ аз мусобиқаҳои байналмилалӣ Гранд-Слам, Гранд-При, Мастерс ва аз дигар мусобиқаҳои сатҳи байналмилалӣ мебошад, ки ин нишондиҳанда нисбат ба соли 2022-юм 153 медал зиёд мебошад.

Вобаста ба баргузории чорабиниҳо дар самти варзиши касбӣ гуфта шуд, ки соли гузашта дар маҷмуъ дар самти варзиши касбӣ 9878 чорабинӣ бо фарогирии 448 874 нафар варзишгар баргузор гардид, ки ин нисбат ба ҳамин давраи соли 2022 (6380 чорабинии варзиши касбӣ бо фарогирии 267 282 нафар варзишгар) аз лиҳози теъдоди чорабинӣ 3494 чорабинӣ ва аз лиҳози теъдоди фарогирӣ 181 592 нафар зиёд мебошад.

Яҳё МАҲМАДНАБИЕВ, “ҶТ”