Аз 2 то 12-юми март дар шаҳри Красноярски Федератсияи Россия 29-умин Универсиадаи зимистона баргузор гардида, дар он зиёда аз 3000 варзишгар аз 50 давлати дунё иштирок менамоянд.

Дар ин мусобиқа Тоҷикистонро 4 варзишгар (Садолати Ибодулло, Сайфиддини Низомиддин, Соҳибназар Соҳибов, Баракатулло Зокиров) бо роҳбарии раиси Ассотсиатсияи варзишгарони муассисаҳои таълимии Тоҷикистон Шодӣ Сафаров муаррифӣ намуда, намояндагони кишвар имрӯз озими макони чорабинӣ шуданд.

Ин чорабинии варзишӣ зери сарпарастии Федератсияи байналмилалии варзиши донишҷӯён (FISU) доир шуда, донишҷӯёни 17-25-сола аз тамоми ҷаҳон имконияти ширкат намуданро доранд.

Донишҷӯ – варзишгарон аз рӯи 11 намуди варзиш барои ба даст овардани 76 маҷмӯи медалҳо мубориза мебаранд: биатлон, лижаронии кӯҳӣ, кёрлинг, лижаронӣ, сноуборд, ҳадафгирии варзишӣ бо лижа, рақси рӯи ях, фристайл, хоккей, хоккей бо тӯб, шорт-трек.

Варзишгарони мо дар намуди лижаронии кӯҳӣ, қувваозмоиҳои слаломи бузург (7-8 март) ва слалом (10-11 март) баромад мекунанд.