Дастаи мунтахаби Тоҷикистон оид ба футбол таҳти роҳбарии мутахассиси гурҷӣ Гела Шекиладзе қабл аз бозиҳои интихобии Ҷоми ҷаҳон-2026 охири моҳи май ва аввали моҳи июни имсол дар Қатар ҷамъомади тамринӣ мегузаронад.

Дар ин бора Федератсияи футболи Тоҷикистон иттилоъ дод.

Чуноне дар хабари мазкур зикр гардидааст, бар асоси нақшаи ситоди мураббиёни мунтахаби Тоҷикистон ҷамъомади омӯзишӣ дар Давҳа 22 май оғоз шуда, то 3 июн идома хоҳад кард.

Дар ҳамин росто бошад, 3-юми июн тими миллии мо барои бозии панҷуми даври дуюми марҳилаи интихобии Ҷоми ҷаҳон-2026 дар гурӯҳи “G” муқобили яккачини Урдун ба Аммон меравад. Рақобати мазкур рӯзи 6 июн дар варзишгоҳи байналмилалии Аммон баргузор шуда, соати 20:30 ба вақти маҳаллӣ ва соати 22:30 ба вақти Душанбе оғоз мешавад.

Пас аз бозгашт мунтахаби Тоҷикистон рӯзи 11-уми июн бозии ниҳоии даври дуюми марҳилаи интихобии Ҷоми ҷаҳон-2026-ро бо тими миллии Покистон дар варзишгоҳи марказии ҷумҳурӣ баргузор менамояд.