Пагоҳ, 31 март дар Варзишгоҳи марказии шаҳри Ҳисор даври ниҳоии марҳилаи интихобии Ҷоми Осиё-2027 миёни мунтахабҳои Тоҷикистон ва Филиппин баргузор мешавад. Бозӣ соати 19:00 шурӯъ гардида, барои мунтахаби Тоҷикистон имконияти хуб барои ба даст овардани натиҷаи мусбат ва муаррифии беҳтари кишвар дар арсаи байналмилалӣ ба ҳисоб меравад.

Пеш аз бозии муҳим, роҳбарияти Федератсияи футболи Тоҷикистон бо бозингарон, ситоди мураббиён ва кормандони маъмурии тими миллӣ мулоқот кард.

Вохӯрӣ дар меҳмонхонаи “Румӣ”-и шаҳри Душанбе дар фазои гарму самимӣ доир гардида, дар он ноиби президенти ФФТ Хуршед Мирзо, узви Кумитаи иҷроияи ФФТ Аҳтам Абдуллозода, котиби генералии Федератсия Фурқат Ахмедҷонов, директори техникии ФФТ Увайдо Давлатбеков ва роҳбари раёсати дастаҳои мунтахаби ФФТ Меҳроҷ Холов ширкат доштанд.

Дар вохӯрӣ роҳбарияти Федератсия ба бозингарон барору муваффақият орзу намуда, таъкид карданд, ки ҳар як бозӣ имконияти арзандаи муаррифии Тоҷикистон дар арсаи байналмилалӣ мебошад. Сармураббӣ Горан Стеванович ва капитани даста Аҳтам Назаров ба ин таваҷҷуҳ сипосгузорӣ карда, чунин мулоқотҳоро ҳамчун неруи тоза ва таҳкими руҳияи даста эътироф намуданд.

Тими миллии Тоҷикистон машқҳои навбатии худро барои омодагӣ ба бозии ниҳоӣ идома дода, бештар ба ҷанбаҳои тактикӣ ва ҳамоҳангӣ байни хатҳо тамаркуз мекунад. Дар машқҳо ҳолатҳои стандартӣ ва бозигузории даставӣ пурзӯр карда шуда, даста бо руҳияи хуб омода мешавад, то натоиҷи мусбат ба даст орад.

Яҳё МАҲМАДНАБИЕВ, “ҶТ”