Дар Маҷмааи таърихию фарҳангии “Қалъаи Хуҷанд”-и маркази вилояти Суғд маросими ифтитоҳи даври вилоятии мусобиқаи ҷумҳуриявӣ оид ба шоҳмот барои дарёфти “Ҷоми Пешвои миллат” баргузор гардид.

Дар чорабинии мазкур раиси вилоят Раҷаббой Аҳмадзода иштирок ва суханронӣ намуда, иброз дошт, ки рушди соҳаи варзиш таҳти таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, барои ҷалби наврасону ҷавонон ва аҳолӣ ба варзиш тадбирҳои зарурӣ амалӣ карда мешавад. Аз ҷумла, ташкили мусобиқаи ҷумҳуриявӣ аз рӯи намуди шоҳмот барои дарёфти “Ҷоми Пешвои миллат” намунаи олии таваҷҷуҳи Сарвари давлат нисбати варзиш мебошад.

Дар идома таъкид гардид, ки ин мусобиқаи ҷумҳуриявӣ дар чор марҳила - дар сатҳи маҳал, деҳа, шаҳрак, ташкилоту муассисаҳо, муассисаҳои таҳсилоти олӣ, миёнаи умумӣ ва махсус, дар сатҳи ноҳия ва шаҳр, дар сатҳи вилоятҳо ва шаҳри Душанбе ва дар сатҳи ҷумҳуриявӣ гузаронида шуда, фонди ҷоизавиаш 100000 сомониро ташкил медиҳад, ки аз ҷониби Пешвои миллат муҳтарам Эмомалӣ Раҳмон ҷудо гардидааст.

Сипас, раиси вилоят рафти бозии шоҳмотро мушоҳида намуда, ба иштирокчиёни мусобиқа барору муваффақиятҳо таманно намуд.

Дар даври вилоятии мусобиқа 100 нафар ғолибони даврҳои қаблӣ иштирок намуда, беҳтаринҳо ба даври ҷумҳуриявӣ роҳхат мегиранд.