Паҳлавони шинохтаву маҳбуби кишвар Сомон Маҳмадбеков дар Чемпионати ҷаҳон оид ба дзюдо миёни ҷавонон (U-21) сазовори медали тилло гардида, унвони чемпиони ҷаҳонро миёни ҷавонон сазовор шуд. Дар таърихи дзюдои кишвар ин аввалин медали тиллои варзишгарони тоҷик дар ҳамаи синну сол аз Чемпионати ҷаҳон маҳсуб меёбад.

Сомон 17 октябр дар қувваозмоии вазни -73кг дар се даври муқаддамотӣ бар варзишгарони Кеп Верд (Семедо Клаудиано), Қирғизистон (Асад Масабиров), Белгия (Абдул Малик Умаев), дар чорякфинал бар намояндаи Италия (Эдуардо Мелла), дар нимфинал бар Самуэл Гасснер аз Австрия ва дар финал бар Георгий Элбакиев аз Русия дастболо шуд. 

Тибқи иттилои сомонаи расмии Федератсияи байналмилалии дзюдо (IJF), дар чемпионат 517 варзишгар (294 мард, 223 зан) аз 81 давлати ҷаҳон иштирок мекунанд. Тавре Кумитаи милии олимпии Тоҷикистон хабар дода буд, дастаи мунтахаби Тоҷикистон дар ҳайати 6 нафар ба Марокаш сафарбар гардиданд, ки дар 3 вазн миёни мардон гуштин мегиранд: Ҷамолиддин Абдуллоев, Идибек Сафаров (-66кг), Сомон Маҳмадбеков, Қоим Шукронов (-73кг), Абубакри Акобир, Эмомризо Анварзода (-90кг).

Чемпионат аз рӯи 14 категорияи вазнӣ (7 вазн миёни мардон, 7 вазн миёни бонувон), ҳамчунин қувваозмоии даставии омехта сурат мегирад. Ғолибону ҷоизадорон дар баробари медалу диплом бо ҷоизапулӣ қадрдонӣ мешаванд: ҷои аввал - 2500 доллари ИМА, ҷои дуюм – 1500 доллар, ҷойҳои сеюм – 850 доллар.

Ёдовар мешавем, ки аз 16 октябр дар кишвари Марокаш Чемпионати ҷаҳон оид ба дзюдо миёни ҷавонон (U-21) шуруъ гардид, ки то 20 идома хоҳад ёфт.