Мақоми ҳафтуми Тоҷикистон миёни 93 кишвари иштирокчии Қаҳрамонии ҷудои ҷаҳон-2025

Тоҷикистон дар Қаҳрамонии ҷудои ҷаҳон - 2025 дар ҳисоби медалҳо бо 3 медали таърихӣ мақоми ҳафтумро миёни 93 кишвари иштирокчии мусобиқа ишғол намуд, ки ин бори аввал дар таърихи ҷудои кишвар мебошад.

Қаҳрамонии ҷудои ҷаҳон аз 13 то 19 июн дар шаҳри Будапешти кишвари Маҷористон баргузор гардида, дар он 556 варзишгар (294 мард ва 262 зан) аз 93 кишвари 6 қораи олам иштирок карданд.

Тоҷикистонро дар ин мусобиқаи ҷаҳонӣ 9 варзишгар - Меҳрзод Суфиев (60 кг) Эмомалӣ Нуралӣ ва Обид Ҷебов (-66 кг), Абубакр Шеров ва Беҳрӯз Хоҷазода (-73 кг), Сомон Маҳмадбеков (-81 кг), Ҷаҳонгир Маҷидов ва Кароматулло Ҳакимов (-100 кг) ва Темур Раҳимов (+100 кг) намояндагӣ карданд.

Аз миёни онҳо Эмомалӣ Нуралӣ дар вазни -66 кг ба гирифтани медали нуқра, Обид Ҷебов низ дар вазни -66 кг ба гирифтани медали биринҷӣ ва Темур Раҳимов дар вазни +100 кг ба гирифтани медали биринҷии Қаҳрамонии ҷудои ҷаҳон дар соли 2025 шарафёб гардиданд.

Қабили қайд аст, ки то мусобиқаи мазкур ҷудокорони Тоҷикистон тайи солҳои соҳибистиқлолӣ аз Қаҳрамонии ҷудои ҷаҳон танҳо ду медали биринҷӣ доштанд, ки онҳоро Расул Боқиев (2007) ва Сомон Маҳмадбеков (2024) ба даст оварда буданд.
Дар Қаҳрамонии ҷудои ҷаҳон – 2025 ҷудокорони тоҷик за худ маҳорати баланди варзишӣ нишон дода, бо ба даст овардани 3 медали қаҳрамонии ҷудо ин шумораро ба 5 адад расониданд, ки беназир аст.

Беҳрӯз ҚАЮМӢ, “ҶТ”