Имрӯз, 13-уми сентябр дар Донишкадаи тарбияи ҷисмонии Тоҷикистон бо ташаббуси Муассисаи давлатии "Маркази такмили ихтисоси кормандони соҳаи тарбияи ҷисмонӣ ва варзиш" мизи мудаввар дар мавзӯи "Рушди варзиш дар замони соҳибистиқлолӣ: мушкилот ва дурнамо" баргузор шуд.

Дар мизи мудаввар Муҳаммадтолиб Шокирзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муҳаммадшо Абдуллозода, ректори Донишкадаи тарбияи ҷисмонии Тоҷикистон ба номи С. Раҳимов, Шаҳбози Искандар, директори муассисаи давлатии "Маркази такмили ихтисоси кормандони соҳаи тарбияи ҷисмонӣ ва варзиш", олимону донишмандон ва таҳлилгарони соҳаи варзиши кишвар иштирок ва суханронӣ намуданд.

Зимни баромадҳо масоили муҳими рушди варзиш дар давраи соҳибистиқлолии Тоҷикистон, мушкилоту имкониятҳо, дурнамои он ва тайёрии ҳамаҷониба ба Бозиҳои олимпии тобистонаи варзишии Лос-Анҷелос-2028 мавриди баррасӣ қарор гирифт.

Дар охири чорабинӣ ба якчанд нафар иштирокчии фаъол Сипосномаҳои Кумитаи кор бо ҷавонон ва варзиш тақдим карда шуд.

Ҳошим РАҲМАТУЛЛОЕВ, “ҶТ”