Солҳои охир пауэрлифтинг дар Тоҷикистон ба яке аз риштаҳои босуръат рушдёбандаи варзиш табдил ёфта, бо афзоиши шумораи варзишгарон, толорҳои муосир ва натиҷаҳои назаррас дар мусобиқаҳои байналмилалӣ мавқеи худро мустаҳкам мекунад. Дар мусоҳиба бо раиси Федератсияи пауэрлифтинги Тоҷикистон Давлатманд Одинаев масъалаҳои асосии рушди ин ришта, ҷалби ҷавонон, сатҳи омодагии варзишгарон ва дурнамои баргузории мусобиқаҳои байналмилалӣ дар кишвар мавриди баррасӣ қарор гирифтанд.

- Нақшаи рушди пауэрлифтинг дар Тоҷикистон барои солҳои наздик чӣ гуна аст ва барои ҷалби ҷавонон ба ин ришта кадом роҳҳо метавонанд муассир бошанд?

- Нақшаҳои зиёде барои рушди пауэрлифтинг дорем, ки яке аз онҳо ин дар вилоятҳо ва шаҳру ноҳияҳо гузаронидани чорабиниҳои варзишӣ ва пайдо намудани ҷеҳраҳои нав, омода ва сафарбар намудани онҳо ба мусобиқаҳои Осиё ва Ҷаҳон мебошад.

- Дар соҳаи пауэрлифтинг мушкилот аз ҷиҳати нарасидани мураббӣ ва лавозимоти техникӣ барои тамрин вуҷуд дорад?

- Дар соҳаи пауэрлифтинг аз муррабӣ танқисие вуҷуд надорад, толорҳои замонавии варзишӣ ва лавозимотҳои техникӣ барои машқу тамрин муҳайё гардидааст. Дар омода гардидани варзишгарон низ мушкилие вуҷуд надорад, фақат онҳоро мебояд, ки зиёдтар машқу тамрин намоянд, чунки ин соҳа қувваи зиёдро талаб менамояд.

- Чемпионати кушоди пауэрлифтинг, ки 15 феврал дар Душанбе баргузор гардид, талаботи шуморо ҳамчун роҳбари федератсия аз нигоҳи сатҳи омодагии варзишгарон ба ин сабқат қонеъ кард?

- Бале, мусобиқаи кушоди пауэрлифтинг дар Душанбе дар сатҳи хуб баргузор гардид, шумораи варзишгарон ҳам зиёд буданд, чеҳраҳои нав бо натиҷаҳои хуб пайдо гардид. Намунаи чунин варзишгарон Оҷилов Ансор миёни ҷавонон дар вазни 74 кг баромад карда, бо нишондоди 155 кг рекорди нав гузошт. Дар ин миён Булбулов Меҳробиддин бо нишондоди 170 кг рекорди нав гузошта, чемпиони мутлақ гардид.

- Рушди пауэрлифтинг дар замони истиқлолро чӣ гуна баҳогузорӣ мекунед?

- Аз соли 2003 то ба ҳол ба куллӣ ин риштаи варзиш дигаргун гардидааст, яъне аз соли таъсисёбии он то ба ҳол рушд ёфта, таваҷҷуҳи ҷавонони зиёдеро ба худ ҷалб намудааст. Ҳамчунин, миқдори нишону ҷоизаҳои варзишгарон афзудааст.

- Дастовардҳои варзишгарони тоҷик дар мусобиқаҳои байналмилалӣ чӣ гунаанд?

- Дастовардҳои варзишгарон дар мусобиқаҳои байналмилалӣ дар ҳолати хуб қарор доранд. Онҳо аз ҳар мусобиқае бо нишону ҷоиза ба ватан бармегарданд ва дар муаррифии кишвар саҳм мегузоранд.

- Оё имкони баргузории мусобиқаи байналмилалии пауэрлифтинг дар Тоҷикистон вуҷуд дорад?

- Пауэрлифтинг варзише мебошад, ки миёни аксари кишварҳо шуҳрат дорад ва мусобиқаҳои сершуморе ҳамасола аз ин навъи варзиш баргузор мегарданд. Мо тайи ду-се соли охир нақша доштем баҳри вусъати ин соҳаи варзиш як Чемпионати Осиё дар Душанбе баргузор намоем ва имсол онро амалӣ хоҳем намуд.

- Кадом омилҳо, ба ҷуз аз малака ва неруи ҷисмонӣ барои ба даст овардани натиҷаҳои баланд дар пауэрлифтинг муҳиманд?

- Барои варзишгарон ахлоқи хуб, тамрини бештар бо мураббии ботаҷриба барои ба даст овардани натиҷаҳои хуб дар мусобиқаҳо сабаб мегарданд.

- Оё Федератсия барномаи махсуси омодагӣ барои маъюбон дорад ва сатҳи иштироки онҳо чӣ гуна аст?

- Худи маъюбон Федератсияи худро доранд, лекин аз намуди ёзидан бо даст (жим лёжа), дар чемпионатҳои Федератсияи мо баромад мекунанд ва онҳо барномаҳои махсуси омодагӣ ба мусобиқаҳоро доранд. Мувофиқи он омода гардида, дар мусобиқаҳо натиҷаҳои хуб нишон медиҳанд.

- Кадом варзишгарони пауэрлифтингро ифтихори кишвар мешуморед ва барои чӣ?

- Ҳамаи варзишгаронро ифтихори кишвар мешуморам, чунки нияту мароми хар як варзишгар ин муаррифӣ намудани давлат ва миллати азизамон дар арсаи ҷаҳонӣ мебошад.

Рустам САМИЕВ, “ҶТ”