Бо мақсади тарғибу ташвиқи тарзи ҳаёти солим, оммавӣ гардонидани варзиш дар байни наврасону ҷавонон, сокинон, ҷалби онҳо ба машғулиятҳои тарбияи ҷисмонӣ ва варзиш ва дарёфти чеҳраҳои нави футбол бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Федератсияи футболи Тоҷикистон, санаи 24 декабр дар шаҳри Душанбе бозии ниҳоии мусобиқаи варзишии ҷумҳуриявӣ аз рӯи намуди футбол байни деҳаҳои аҳолинишини шаҳру ноҳияҳои кишвар бахшида ба 30 - солагии Истиқлолияти давлатии Ҷумҳурии Тоҷикистон баргузор гардид.

Бозии ниҳоӣ байни дастаи "Истаравшан"-и шаҳри Истаравшан ва дастаи "Турсунзода"-и шаҳри Турсунзода доир гардида, дар натиҷа дастаи "Истаравшан" бар дастаи "Турсунзода" пирӯз шуда, ғолиби мусобиқаи ҷумҳуриявӣ оид ба футболи "деҳа ба деҳа" шуд.

Дар фарҷоми мусобиқа ба ғолибон аз тарафи Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Алишер Урунов, ноиби Президенти Федератсияи футболи Тоҷикистон медал, ҷозаҳои пулӣ, диплом ва Ҷоми мусобиқа тақдим карда шуд.