Муштзани навраси тоҷик Беҳрӯз Умаров (50 кг) шоми 23 октябр бо ғалаба 3-юмин Бозиҳои Осиёӣ миёни наврасонро дар Баҳрайн оғоз кард.

Муштзани тоҷик дар рақобати аввал намояндаи Узбекистон - Ҳабибулло Сайназаровро шикаст дода, ба даври баъдӣ роҳ ёф.
Ёдовар мешавем, ки Беҳрӯз Умаров дар 3-юмин Бозиҳои ИДМ дар Озарбойҷон ба гирифтани медали тилло ноил гардида буд.
3-юм Бозиҳои осиёии наврасон дар Баҳрайн рӯзи 22 октябр расман оғоз гардид ва қарор аст то 31-уми октябр идома ёбад. Ба барномаи Бозиҳо 26 намуди варзиш шомил аст ва аз рӯйи онҳо 256 мусобиқа баргузор мешавад.

Бояд гуфт, ки дар 3-юм Бозиҳои осиёии наврасон Тоҷикистонро 65 варзишгар аз рӯйи 12 намуди варзиш: варзиши сабук, шиноварӣ, бокс, бадминтон, ҷудо, гӯштии тарзи озод ва юнонӣ-римӣ, кураш, варзиши электронӣ, ҷиу-ҷитсу, муай, таеквондо, ММА, намояндагӣ мекунанд.

Аммо дар асоси барномаи Бозиҳо, аллакай, баъзе мусобиқаҳо ба мисли ҳендбол, пенсак-силат, каббода ва кураш – 19-уми октябр оғоз гардиданд.

Аз варзишҳои қаблан оғозгардида варзишгарони тоҷик дар намуди кураш аввалин медал ба даст оварданд, ки ба Абубакр Тураев дар вазни 65 кг тааллуқ дорад. Тураев дар ин вазн бо баромади шоиста сазовори медали биринҷӣ гашт.

Гуфтан зарур аст, ки дар 2-юм Бозиҳои осиёии наврасон, ки соли 2023 дар Нанҷинги Чин доир гашта буд, варзишгарони мо 2 медал – як нуқра, як биринҷӣ ба даст оварда буданд.

Яҳё МАҲМАДНАБИЕВ, “ҶТ”