Бозиҳои даври 13-уми лигаи олии кишвар бо ду ғалабаи меҳмонон ва як пирӯзии мизбонон хотима ёфт.
Бозии марказии ин давр, рӯзи 26- июн, дар варзишгоҳи КМВА-и Вазорати мудофиаи ҶТ байни дастаҳои ССКА “Помир” ва “Истиқлол” –и шаҳри Душанбе баргузор гардид, ки дар ин дидор меҳмонон тавонистанд, бо ҳисоби 0-4 соҳибони майдонро шикаст диҳанд.

Аз ибтидои қисми аввали рақобат футболбозони ҳарду даста ба дарвозаи якдигар ҳамлаҳои головар анҷом доданд. Дар дақиқаи 13-уми дидор соҳибони майдон қоидаи бозиро вайрон намуданд ва довари марказӣ Сайёдҷон Зайниддинов ба дарвозаи Анатоли Старушенко зарбаи 11- метра таъин намуд ва ин фурсатро ҳамлагари “Истиқлол” Дилшод Восиев ба осонӣ истифода бурда, дастаашро ба пеш баровард.

Голи дуюми меҳмононро дар дақиқаи 41-ум сардори даста Фатҳулло Фатҳуллоев ба ҳадаф расонид ва футболбозон бо ҳисобӣ 0-2 ба танаффус баромаданд.

Муҳсин Муҳаммадиев сармураббии дастаи “Истиқлол” дар қисми дуюми бозӣ бо ду голи задаи шогирдонаш қаноат накарда, дар дақиқаи 64-ум хатти ҳамларо пурзӯр намуд. Манучеҳр Ҷалилов ҳамлагари “Истиқлол” пас аз 4 дақиқаи ба майдон ворид шудан, голи сеюми дастаашро ба номаш сабт намуд.

Дар дақиқаи изофии қисми дуюм (90+2) Манучеҳр Ҷалилов ҳамлагари меҳмонон тӯби чоруми тимашро вориди дарвозаи Анатоли Старушенко намуда, бозингари беҳтарини ин дидор дониста шуд.

Рӯзи 25-уи июн, дидори дуюми ин давр миёни тимҳои “Хуҷанд”-и шаҳри Хуҷанд ва “Вахш”-и шаҳри Қурғонтеппа баргузор гардид, ки хуҷандиҳо дар ин дидор бо ҳисоби 4-1 ба пирӯзӣ ноил гардиданд.

Дилшод Бозоров ҳамлагари дастаи “Хуҷанд” дар дақиқаи 8-ум голи аввали бозиро ба номаш сабт намуда, пас аз 17- дақиқа ҳамлагари дигари меҳмонон Фарҳод Тоҳиров голи дуюми дастаашро ба ҳадаф расонид.

Умарҷон Шарипов, ҳимоятгари соҳибони майдон дар дақиқаи 47-уми бозӣ ба дарвозаи меҳмонон голи ягонаи дастаашро ворид намуд.
Ду голи дигари тими “Хуҷанд”-ро дар дақиқаҳои 66- 88 Фарҳод Тоҳиров ва Дилшод Бозоров ба дарвозаи Шаҳром Исмоилов ворид намуданд.

Ҳисоб 4-1 ба фоидаи меҳмонон ба анҷом расид ва беҳтарин бозингари ин рақобат Фарҳод Тоҳиров дониста шуд.

Тими “Ҳосилот” чанд муддат дар лигаи олӣ ба нокомиҳо рӯ ба рӯ гардида бошад ҳам, дар даври 13-ум бозии хуб нишон дода, мавқеашро дар ҷадвал боло бардошт.

Дар ин давр тими “Ҳосилот”-и ноҳияи Фархор дар майдони худ дастаи “Панҷшер”-и ноҳияи Ҷ. Балхиро қабул намуд. Дар ин бозӣ соҳибони майдон дар шоҳидии 3000 мухлис ҳарифашро бо ҳисоби 3-2 шикаст дод.

Голи аввалинро дар дақиқаи 16-ум ҳамлагари меҳмонон Фирдавс Зайнуллозода марбути номи худ кард ва пас аз ду дақиқа нимҳимоятгари “Ҳосилот” Ҷонибек Муминов ҳисобро баробар намуд.

Футболбозони дастаи “Панҷшер” пас аз голи Ҳасан Холов, ки дар дақиқаи 39-ум ба ҳадаф расонид, бо ғолибият ба танаффус баромаданд.

Дар қисми дуюми дидор дар дақиқаҳои 47-79 ба нимҳимоятгар дастаи “Фархор” Муҳаммадҷони Ҳасан муяссар гардид, ки ду тӯбро вориди дарвозаи Сафар Наботов намуда, дубл анҷом диҳад.

Бозии охири даври 13-уми Чемпионати Тоҷикистон рӯзи 29-уми июн ҷамъбаст мегардад. Дар ин рӯз дастаи "Регар-ТадАЗ"-и шаҳри Турсунзода дар варзишгоҳи “ТАЛКО-Арена” тими “Барқчӣ”-и шаҳри Ҳисорро қабул менамояд. Вохӯрии ин дастаҳо соати 18:00 шуруъ мешавад.

Пас аз хотимаи даври 13-ум дастаи “Истиқлол”-и шаҳри Душанбе бо доштани 30 имтиёз садрнишини ҷадвали мусобиқа мебошад. Тимҳои “Хуҷанд” ва ССКА “Помир” бо гирифтани 21 холи дар ҷойи дуюм ва сеюм қарор доранд.

                                                   И  В Н П М   О
1 “Истиқлол” (Душанбе)          12 9 3 0 37-6 30
2 “Хуҷанд” (Хуҷанд)                 13 6 3 4 21-12 21
3 ССКА “Помир” (Душанбе)    13 5 6 2 9-7 21
4 «Ҳосилот” (Фархор)              13 4 3 6 13-22 15
5 “Регар-ТадАЗ” (Турсунзаде) 12 3 5 4 8-12 14
6 “Баркчи” (Ҳисор)                    2 3 4 5 7-14 13
7 “Панҷшер” (Ҷ. Балхӣ)            13 3 2 8 16-28 11
8 “Вахш” (Қурғонтеппа)             12 2 4 6 7-17 10

Нишонзанҳо: Манучеҳр Ҷалилов (Истиқлол)- 12 тӯб, Дилшод Бозоров (Хуҷанд) – 7 тӯб, Фарҳод Тоҳиров (Хуҷанд) – 6 тӯб.

Шаҳбози АСОМИДДИН, “ҶТ”